Mizo pathum telna India inlan dawn
India coach Stephen Constantine-a'n March 28-a Myanmar nena Asian Cup qualifier match khel tur India squad-ah Mizo pathum Jeje Lalpekhlua, Daniel Lalhlimpuia leh Jerry Lalrinzuala te a ko tel a, Mizo tlangval pathum telna India team hian inbuatsaih nan vawiin tlai dar 5:00-ah Cambodia chu friendly match an khelhpui dawn.
India-in an friendly match hnuhnung ber chu September 2016 khan an khel a, a hunlaia hmun 38 laia an thlauh Puerto Rico chu Narayan Das, Jeje Lalpekhlua, Sunil Chhetri leh Jackichand Singh goal khung hmangin 4-1 in an sawp. Vawiina an hmachhawn tur Cambodia aiin India hi FIFA ranking-ah 41 zetin an sang zawk a, Constantine-a naute hian an huphurh lo ang.
Tunge inlan dawn?
India tan Norwegian club ṭha Stabæk goalkeeper Gurpreet Singh Sandhu chu si ban nghak tura beisei a ni a, tlarhnungah Sandesh Jhingan, Arnab Mondal, Pritam Kotal leh Narayan Das te an inkawp rin a ni. India buaina tur chu midfield a ni a, hei hi Constantine-a squad thlan dan vanga sawisel theih a ni bawk.
Khasi midfielder Eugeneson Lyngdoh chu innghahna ni ṭhin mah se tun hnaiah beisei a phak lo a, Jackichand Singh, Rowllin Borges leh Mohammed Rafique-te hi an club khelhnaa hmun pawimawh chang phak lo vek an ni - Constantine-a'n midfield a rem dan tur hmuh a chakawm hle.
Mizo inlan tur
Ṭum dang ang bawkin tlarhmaah Jeje Lalpekhlua leh Sunil Chhetri an inkawp rin a ni a, hetihrual hian tun hnaiah Jeje-a'n goal khung a chawlhsan avangin East Bengal tana khel ṭha ṭhin Robin Singh a inlan a nih pawhin a mak lo ang. India-in tlarhmaah players langsar pathum an neih miau avangin rawlthar Daniel Lalhlimpuia tan bench aṭanga tlan luh chu beiseiawm zawk a ni.
India coach Constantine-a'n ram tana la khel ngai lo player-te friendly match-ah debut match khelhtir a ching ṭhin a, a vawi khat nana koh Jerry Lalrinzuala'n hmun a chang nghal a nih pawhin thil mak a ni lo ang. DSK Shivajians defender Jerry bakah hian Anas Edathodika, Nishu Kumar leh Milan Singh-te chu India tana la inlan lo vek an ni bawk.
Cambodia dinhmun
FIFA ranking-ah Cambodia hi 173-na an ni a, India nena an intawn hnuhnung ber chu 2007 Nehru Cup-ah khan niin India hian Ambedkar Stadium, New Delhi-ah 6-0 ngawtin an sawp - he inkhela goal hnih khungtu Sunil Chhetri chu vawiina India captain a ni.
Angkor Warriors (Cambodia sawina) hian an match hnuhnung berah Saudi Arabia chu 7-2 ngawta an ngam loh avangin coach thar Leonardo Vitorino an lalut a, vawiin inkhel tur hi Brazilian club ṭha Botafogo coach hlui enkawlna hnuaia an match hmasa ber tur a ni dawn - chak loh an duh dawn lo.
India hmabak
All India Football Federation (AIFF) chuan Lebanon leh Palestine nen friendly match an khelh tur thu an puang leh tawh a, Lebanon nen hian June 7-ah inhmachhawnin October 2-ah Palestine nen an inkhel leh bawk dawn a ni.