Federer a sang tual tual
World number 17 ni chungin season bul a ṭan a, Thawhṭanni zana ATP ranking tar tihchhuah a nih leh meuh chuan Roger Federer chu world number 6 a ni leh tawh.
Grand Slam vawi 18 champion tawh Federer hian kuminah Australian Open leh Indian Wells Masters nomawi a chawi tawh a, heng inelna lianah hian a elpui leh a hneh hleihtheih loh Rafael Nadal a hneh ve ve. Spain tlangval Nadal hi world number 7 a ni thung. Season hmasa hmang ṭhatu Andy Murray chu a chung berah awmin Novak Djokovic-a'n a zui bawk.
Hmeichhe lamah Australian Open nomawi a chawi hnua la inkhel leh lo Serena Williams chuan point a hmuh belh loh avangin number 2-ah a tlak thlak a ṭul. Nomawi chawi lo mah se German nula Angelique Kerber chu number 1 a ni chho thung.
Tun seaon-a ATP World Tour Masters 1,000 tournament pahnihna tur Miami Open chu tunkar chhung hian khelh zui a ni dawn a, Federer leh Nadal bakah Stan Wawrinka, Milos Raonic leh tun hnaia khel ṭha Pablo Carreno Busta te an inlan ang.
ATP Ranking Thar
# Player Ram Points
1 Andy Murray GBR 12,005
2 Novak Djokovic SRB 8,915
3 Stan Wawrinka SUI 5,705
4 Kei Nishikori JPN 4,730
5 Milos Raonic CAN 4,480
6 Roger Federer SUI 4,305
7 Rafael Nadal ESP 4,145
8 Dominic Thiem AUT 3,465
9 Marin Cilic CRO 3,420
10 Jo-Wilfried Tsonga FRA 3,310