Prince Poldi ṭha deuhin aw!!! Zaninah Germany Vs England
Germany-in zanin dar 1:15 hian Borussia Dortmund khelmual Signal Iduna Park-ah England an mikhual dawn a, international friendly satliah a ni dawn lo - Lukas Podolski thlahna tura a inkhel a ni. Bayern Munich leh Arsenal striker hlui Prince Poldi thlahna inkhel hi Sony Six-ah a en theih ang.
Friendly match maw?
Germany leh England te hi football khelh thiam ram ve ve an ni a, an inhal bawk avangin an inkhelh tawh hi chuan ngaihven a hlawh zel. Tun ṭuma an inkhelh chhan tak hi chu 2018 FIFA World Cup qualifier atana inpuahchah nan a ni.
Germany hi Group C-ah hmahruaitu an ni a, an match khelh tawh vawi liah an chak vek. March 26, Pathianni zan khian Die Mannschaft hian Azerbaijan an hmachhawn ang.
England hi Group F-ah a chung berah an awm a, Slovenia an draw tih loh chu an khingpui an hneh vek. Gareth Southgate-a hote hian point 10 an hmu tawh a, Pathianni zan khian Lithuania an mikhual ang.
1966 FIFA World Cup Final-ah England-in Geoff Hurst-a hattrick hmangin West Germany 4-2 in an hneh a, tun thlengin an champion awmchhun a la ni. Extra time-a English striker Hurst-a goal hmasa zawkin sawi zui a hlawh a, German supporter-te ngaihdanah chuan ball-in goalline a pel lo.
2010 FIFA World Cup-ah Germany-in England hi last 16-ah 4-1 in an hneh a, hemi ṭum hian Frank Lampard ball petin crossbar a per hnuah chiang takin goalline pel mah se pawm sak a ni lo - result a danglam phah. Heng result pahnih hi ram lian pahnih an intawn tawh chuan sawi nawn a hlawh a, inelna a san poh leh boruak tih ṭan nan an sawi uar ang.
Inkhel tur chu
Germany goalkeeper Manuel Neuer chu chawn hliam vangin a inhnuk dawk a, Bayern Munich goalkeeper aiah hian PSG keeper Kevin Trapp chu koh a ni. Die Mannschaft-ah hian Bayer Leverkusen keeper Bernd Leno leh Barcelona keeper Marc-Andre ter Stegen te an awm avangin Trapp tan khelhna hmun chan a harsa ang.
England tan West Ham winger Michail Antonio chu malpui hliam vangin a tel thei dawn lo a, Gareth Southgate-a hman theih turah Adam Lallana, Jesse Lingard, Alex Oxlade-Chamberlain, Nathan Redmond leh Raheem Sterling te an awm avangin Antonio aiawh tur hi koh a ni lo.
Germany-in tun hnaiah striker ṭha an nei lo a, hmabak nei êng tiha an sawi Timo Werner chu koh zingah a tel. Kum 21-a upa RB Leipzig striker hi ram tan senior team-ah a la inlan lo a, tun season Bundesliga-ah goal 14 a khung tawh. RB Leipzig hian nikum khan VfB Stuttgart aṭangin euro maktaduai 10 bawr velin an la lut a, an club history-a player manto ber a ni.
England lamin kum 34-a upa Jermain Defoe an ko tel thung a, Sunderland striker chuan, "Ram tana khelh hi ka ning thei lo a, khelh belh zel ka duh. Inelna lian thama England jersey hak leh hi ka duhthusam a la ni reng," tiin FIFA World Cup khelh a la inbeisei thu a sawi. Defoe hi 2014 FIFA World Cup leh 2016 UEFA Euro-ah te telh a ni lo a, kum thum hnuah England kawr a ha leh dawn tihna a ni.
Poldi ṭha deuhin aw...
Lukas Podolski hian June 6, 2004 khan Germany tan a vawi khat nan a inlan a, kum 19 leka upa khelhtirtu chu manager Rudi Voller a ni. Tunah hian Podolski hi kum 31 chauha upa ni mah se ram tan vawi 128 a inlan tawh a, goal pawh vawi 48 zet a khung tawh.
Germany-in 2014 FIFA World Cup an champion ṭum khan squad-ah a tel a, kum 2006 World Cup-a pathumna a nih phei chuan Best Young Player a thlan a ni. Euro 2008-ah Germany pahnihna a ni a, hemi ṭum hian Poldi hi team of the tournament-ah thlan a ni.
Poldi hi khawvelah player langsar a ni pha a, Germany-ah a lar lehzual a, chuvangin German football tan chuan zanin hi hun pawimawh a ni.