NECS Cup 2017 Ramhlun North tan semi final kawng a bo

Mizoram Premier League club nei Ramhlun North chuan NECS Cup 2017 quarterfinal match hnih an khelh tawhah chak ni hmel an hmu lo a, inkhel hmabak pakhat la nei mah se semifinal an lut thei tawh lo.

Nimin Lammuala Ramhlun derby khelhah Ramhlun South-in Van­lalthlamuana goal hnih bakah Lalmawizuala, R. Lalthanmawia leh R. Vanlalrinsanga te goal khat ṭheuh hmangin Ramhlun North 5-1 in an sawp. Veteran midfielder Samson Ramengmawia hoa khel Ramhlun South hi round a sang tual tuala an hlauhawm tawlh tawlh. Inkhel pakhat zawkah Thingsulthliah chu Armed Veng South nen 1-1 in an inhnehtawk bawk.

Pool A-a team pali te hian match khat

ṭheuh an la khel leh dawn. Point li nei tawh Armed Veng South leh Ramhlun South an la inkhel dawn a, an inhnehtawk a nih chuan an pahniha tlang thei dinhmunah an ding. Khelh hniha point hnih hmu Thingsulthliah tan beisei bo a la ni bik lo, an match hnuhnung bera Ramhlun North an hneh a nih chuan a sang pali zinga tel turin kawng a la inhawng ve bawk.

Chak mamawh pahnih

Vawiin chawhma dar 11:00 hian an match hmasa zawka chak lo pahnih Bawngkawn leh Electric Veng an inhmachhawn dawn. MS Dawngliana awmna Bawngkawn hi Chhinga Veng lakah 7-0 in an mualpho a, football ngaina veng tan a zawna mualpho nawn a hrehawm ang - Bawngkawn tan player 12-na fans an pawimawh hle ang.

Tun inelna neih mekah goal 27 khung tawh Chhinga Veng chuan chawhnu dar 1:00-ah Sihphir Venghlun an hmachhawn zui ve dawn bawk. Sihphir Venghlun hian NECS Cup 2017-a goal thum khung tawh Samuel Lalchhandama an nei, Samuel-a hian an match huhnung berah Electric Veng 2-1 a an hnehna goal a khung.