Thunder ngamtu Warriors

NBA regular season kal mekah Golden State Warriors chuan a zawna match li hnehna an chan­na ni turin nimin zing khan Oklahoma City Thunder chu 111-95 in an hneh.

Chesapeake Energy Arena-a inkhelah Golden State tan Klay Thompson leh Stephen Curry te chu player pawimawh an ni a, point 34 leh 23 score in hnehna an chan theih nana sulsutu pawimawh an ni.

Warriors leh Thunder te hi tun season-ah vawi li an intumna a ni a, an inhmachhawn hmasa pathumah Warriors hian point 16 aia tamin hnehna an chang ziah, an intawn hnuhnung berah pawh point 16 thoin hnehna an chang leh bawk.

NBA Most Valuable Player Curry chuan, "Klay khan duhthusama ṭhain a khel, a score theih piah lamah ṭhiante tan a ṭangkai hle, ani a awm hi chuan thlamuang takin inkhel kan hmachhawn thei ṭhin," tiin a sawi.

Warriors hian an match hnuhnung pahnih­ah point 30 leh 25 zeta hnehna an chang theih avangin coach Steve Kerr chuan fourth quarter-ah Curry a hahchawlhtir ṭhin. Thunder lakah pawh minute 9 chauh a awm tawh tihin 98-71 a hma an hruai tawh avangin MVP Curry hi bench-ah hahchawlhtir leh a ni.

Western Conference hmahruaitu Golden State hian match 56 zet hnehna an chang tawh a, ṭum 14 dang chu chesual ve tawh mah se season tawpa playoff khel turin an tling tawh. Tukin zing dar 6:00 hian Dallas Mavericks nen an inkhel zui leh nghal.