Barca pan hreh Iniesta

Andres Iniesta chuan a naupan lai chanchin an zawhna chhangin Barcelona zawm turin a pianna khua Fuentealbilla chhuahsan a hreh thu a sawi chhuak.

Spain international Iniesta hian kum 12 mi chauh a nih laiin Barcelona a zawm a, a senior career chinah chuan Barca ni lo club dang a nei lo. Catalan club tan hian inelna hrang hrangah match 619 khelin goal 55 a khung tawh.

Kum 32-a upa Iniesta chuan, "A nihna takah chuan ka naupan lai khan ka chhungte kalsana hmun danga awm kha ka hreh hle. Ka pain min kal pui a, ani chuan inrintawkna min pek bakah thu ṭha tam tak min hrilh bawk. Barca tana ka khelh chhoh theih chhan pakhat chu ka pa a ni a, naupang duhthlanna pawh hmang thiam lo ka nih lai khan ka tan ṭha tur a lo hre tawh," tiin a pa a zah thu a sawi.

Barcelona tan a khelh chhungin Inesta hian nomawi tam tak a chawi tawh a, chung zinga chuan La Liga nomawi pariat leh Champions League title pali a tel. Tun season-ah hliam vangin a inlan tam tawk lo, inelna hrang hrangah match 26 chiah a ka khel - League bakah Champions League-a champion thei dinhmunah an la ding.

Iniesta hian kum 2018 nipui thleng daih contract a nei mek a, Barca sporting director Robert Fernandez chuan an captain hi hun rei zawk atan contract thar an ziah pui ngei a beisei thu a lo sawi tawh.