Hmabak a ko - hmuaktu Merseyside derby

Liverpool-in Pathianni zan dar 9:31-ah FA Cup third round an khel dawn a, an hmachhawn tur hi an ṭhenawm club Everton a ni. 

Merseyside derby a nih tawh chuan eng inkhel pawh ni se a boruak a sang ṭhin a, Pathianni zana Anfield-a inkhel tur pawh hi a boruak a san loh ring suh. Pathianni zan inkhel tur boruak tidanglamtu pakhat chu Carlo Ancelotti a ni a, European coach hlawhtling ber pawl hi Everton coach a ni tawh. 

Champions League nomawi ringawt pawh vawi thum lo chawi tawh coach hi December 21 khan Everton chuan an coach atan an lakluh thu an puang a, a hnuaiah match thum an khel tawh. Premier League-ah Burnley leh Newcastle United an hneh nghal a, mahse league match hnuhnung berah Manchester City chu 2-1 in an ngam lo thung. 

Squad enin City laka tlawm hi Ancelotti tan tlawma lak chi a ni lo a, Liverpool erawh anni aia ṭha ni mah se hmelma kumhlun an nih miau avangin fan-ten chak an beisei ang. Liverpool tana he inkhel ti hautak tu chu league-a Tottenham Hotspur leh Manchester United an hmachhawn zui tur hi a ni a, Klopp-a'n player hman dan a thiam a ngai dawn. Fabinho, Alex Oxlade-Chamberlain leh Joel Matip te chu Reds hian hliam vangin an chhawr thei lo mek a, Keita a inhliam belh bawk - Klopp-a'n duhthlan tur player 13 a nei dawn a, player thar Takumi Minamino kan hmu a nih pawhin a mak lo ang.

 

Klopp chuan, "Tun dinhmunah chuan eng angin nge player ka rem dawn ka la sawi thei lo a, mahse Liverpool jersey haa inlan apiang chuan 100% theihna an pek zel a ngai ang," a ti.