Vawiinah Santosh Trophy Semifinal Mizoram vs West Bengal
Mizoram tan Santosh Trophy semifinal thlen thil thar ni tawh lo mah se inchhuang thei erawh an ni lo - final luh inchuhnaa an khingpui tur West Bengal hian nomawi vawi 31 an chawi tawh.
GMC Bambolim-ah vawiin tlai dar 3:00 hian Mizoram leh West Bengal ten Santosh Trophy vawi 71-na semifinal hmasa zawk an khel dawn a, zan dar 7:00-ah Kerala leh inelna thlengtu Goa an inhmachhawn ang.
Chhuan tlak loh record
Mizoram hian kum 2010 khan a vawi khat nan Santosh Trophy-ah quarterfinal an thleng ve chauh a, hemi ṭum hian West Bengal lakah 7-1 zetin an tlawm.
India ram football thunun ṭhintu West Bengal leh Mizoram hi an intum zen zen lo a, kum 2005 khan state pahnih hi 1-1 in inhnehtawk mah se Mizoram hi final round lut pha lo zawk an ni.
Kum 2004-ah pawh qualifying round-ah an awm dun a, West Bengal-in Mizoram 5-1 in an sawp. Hemi ṭuma Bengali keeper Rajat Ghosh chuan, "Mizoram kan hmachhawn hian kan lawm ṭhin. Point hmuh ringawtah kan lungawi lo a, goal tam tak khung kan tum ṭhin. Tunah erawh a danglam tawh," tiin Vanglaini palai a hrilh a, he thu hian Mizoram football-in hma a sawn zia a pholang.
Ni e, a dang tawh
Mizoramin inelna hnuhnung paliah vawi thum semifinal an lut thei a, West Bengal erawhin kum 2011-a an champion hnua semifinal an luh leh theih hmasa ber a ni.
Amaherawhchu West Bengal hian club ṭha tak tak an ngah avangin an chhe ngai lo a, tun ṭuma an player pawimawh Manvir Singh pawh Punjabi tlangval a ni. Vawi 43 final lut tawh team ṭhatna tak erawh an tlarhnung a ni a, match li khelh tawhah goal an la chhuah lo.
Mizoram manager Lalthanzama Vanchhawng chuan, "West Bengal inkhel hi kan en tawh. Kerala kha 1-4 zetin hneh lo mah ila, ka hmuh dan chuan West Bengal hi an ṭha zawk a, tun inelnaa team ṭha ber a ni," tiin an khingpui tur ṭhat thu a sawi.
Mizo an huaisen
Mizoram hi Kerala laka an tlawm hnuin an indawm kun lo a, Railways lakah tun inelnaa an khelh ṭhat ber ṭum tawngin goal nga zet an khung. Semifinal-ah hian coach Lalsangzuala Hmar-in hrem vanga Railways hmachhawn thei lo Lalfakzuala leh Israel Laldingngheta te a chhawr thei tawh bawk ang.
Mizoram manager Zama chuan, "Coach Sanga leh physio Mapuia te nen hian a vawi khat nan Mizoram kan hruai a, semifinal kan lut thei hi kan lawm. Amaherawhchu final kan thleng lo a nih chuan kan rilru a na dawn a, a chhan chu kan duh ber chu champion a nih vang a ni. Nomawi nena Mizorama rawn haw hi kan duh a, chumi tithei tur chuan kan theihna zawng zawng nen kan khel ang," tiin an thlen chinah a la lungawi lo.
Mizoram coach Lalsangzuala Hmar chuan, "West Bengal khelh dan kan zirchiang tawh a, game plan pawh kan siam uluk. Tunah chuan huaisen taka semifinal hmachhawn hi kan tih tur a ni a, khua a lum deuh a nih pawhin kan tha kan thlah loh a ṭul a ni," tiin chak ngei an tum thu a sawi.
Semifinal - Vawiin
3:00 PM West Bengal Vs Mizoram
7:00 PM Kerala Vs Goa
Final - March 26, Pathianni
Note : Inkhel hi DD Sports-ah a en theih ang.
Semifinal Kalkawng
MIZORAM
Mizoram 3 - 1 Maharashtra
MIZ : V. Lalchhuanawma 8'; Lalfakzuala 44'; F. Lalrinpuia
Punjab 0 - 0 Mizoram
Mizoram 1 - 4 Kerala
MIZ : Lalrammawia 87'
KER : Jobby Justin 7'; Seesan S 9'; Asharudeen 64', 84'
Railways 1 - 5 Mizoram
MIZ : V. Lalchhuanawma 24'; F. Lalrinpuia 59', 83';
Lalrinchhana 71'; Lalsangbera 78' (P)
WEST BENGAL
Chandigarh 0 - 1 West Bengal
WES : Sheikh Faiaz 90'
West Bengal 1 - 0 Services
WES : Basalts Singh 24'
Goa 0 - 0 West Bengal
West Bengal 2 - 0 Meghalaya
WEB : Shaikhom Ronald Singh 9'; Manvir Singh 85'
Goal khung theite
# Player Team Total
1 Rajesh Soosanayakam Railways 4
2 F. Lalrinpuia Mizoram 3
2 Jobby Justin Kerala 3
4 V. Lalchhuanawma Mizoram 2
4 Manvir Singh Punjab 2
4 Muhammed Parakkottil Kerala 2
4 Asharudeen Kerala 2
Note : Final round-ah goal hnih aia tam khung player pasarih chiah an la awm.