Treble champion tum Tuikual South NBA D League player Palpreet inlan dawn?

Mizoram Super League Season 3 khel tur zingah hming langsar thar an awm belh leh ta. Tukual South-in NBA D-League player Palpreet Singh Brar an lakluh thu nimin khan an puang chiang a, zanina Zarkawt BCA nen an inhmachawn hunah India player Amyjot Singh nen a inlan nghal beisei a ni.

Mizoram chhunga basketball inelna sang ber en man hi Rs 100 leh Rs 30 chauh a ni a, India player ṭha en theihna a nih avangin club ṭan nei lo tan pawh Hawla Indoor Sta­dium pan ngei chi a ni.

Treble champion

Tuikual South hi MSL2 finalist an ni ri­ngawt lo a, tun season ṭan­na atana inelna Season Opening Tournament-ah an cham­pion. MBBA Cup-ah Phenghphehlep hian Zarkawt BCA hi semifinal-ah an hneh a, an champion zui bawk.

MSL3-ah coach KC Lal­liantluanga kaihhruai team hian nomawi an chawi a nih chuan treble champion an ni dawn a, hlawhtlinnna ropui bik tia chhal theih a ni ang.

Phengphehlep hian he hlawh­tlinna chang tur hian tual­chhung player ṭha F. Zodinthara, Lalmuanpuia Zote leh Van­chuangpuia te an neih bakah India ram chhunga player ṭha ber ber an lalut. Feet ruk leh inches riata sang Amjyot Singh hi India team-ah Khatla TBL chakpuitu Garry Gill aiin dah san a ni zawk.

Palpreet Singh phei chu Amjyot leh India captain Am­ritpal Singh te tel phak lohna NBA D-League khel thei tura thlan a ni a, Long Island Nets player a ni. NBA D-League ah hian India rama sei lian khel thei hmasa ber chu Satnam Singh Bhamara a ni a, hemi zawha khel leh thei hmasa ber leh awmchhun chu Palpreet hi a ni a, hei hian Tuikual South player ṭhat zia a sawifiah chiang hle.

Hei erawh hriat a ṭha - MSL-ah quarter khatah chiah state pawn player pahnih a luh rual tir theih.

Mizo hlang

Zarkawt BCA-in MSL2-ah Mizo hlanga khelh an thlang a, eng ruai an ni lo. MSL3-ah India team-a hmun pawimawh chang pha Amritpal leh Yadwinder Singh an lalut a, amaherawhchu ONGC player pahnih hian Federation Cup an khelh avangin Tuikual South an la hmachhawn thei dawn lo.

BCA-in Mizo hlangin an khel dawn a, hei vang hian David Lalruat­fela, Dennis Lal­muanpuia, Mathew Rem­tluanga Sailo leh player thar Dennis Lalmuanpuia ten mawhphurhna an lak ngam a ṭul dawn.

A chiang lo

Tuikual South mana­ger Lalremsiama Hrahsel chuan, "Kan player-te hi kan inkhelh niah (vawiin) an rawn thleng dawn chauh a, khaw awm dan a zirin lo thleng lo thei an ni. Rawn thleng ta pawh ni se an la inpeih tawk lo thei a, kan chak chiang tihna a ni lo," tiin team ṭha zawkah a inchhal duh lo.

TKS hian ṭantu an nei ṭha ṭhin a, Zarkawt BCA an hmachhawn hunah 'Phengphehlep ṭial mawite' tih sa rual tham an pung khawm nghal ang.

Zarkawt BCA coach Lalruat­fela chuan, "Team sheet aṭanga kan en chuan an buk a rit zawk dawn a, amaherawhchu kan Mizo player-te hi te reuh te te ang kha an ni lo. Player lian ṭha tak tak kan kawl a, hneh­na chan tumin Tui­kual South kan hma­chhawn ang," tiin an zam loh thu Vanglaini palai a hrilh.