Portugal Player of the Year Cristiano Ronaldo

Real Madrid forward Cristiano Ronaldo chu Portugal player of the year 2016 atan thlan a ni a, he dinhmun luah tur hian Real tana a khelhpui defender Pepe leh Sporting Lisbon goalkeeper Rui Patricio a khum.

Ronaldo hian Real Madrid-in Champions League nomawi an chawi­na kawngah goal 16 zet khungin a thawhhlawk takzet a, Euro 2016-ah captain armband hreng chungin Portugal a champion pui bawk.

Kum 32-a upa forward chuan, "2016 kha ka tan chuan kum duhawm tak a ni a, nomawi ka la chawi ngai hauh loh Euro ka chawi avangin ka lawm hle. Portugal mipuite hnenah lawmthu ka sawi a, nomawi kan chawina kawngah khan inrintawkna nasa tak min pe a ni," a ti.

Ronaldo hian Ballon d'Or leh FIFA Best Player chawimawina a lo dawng tawh bawk. Potuguese football award sem zanah hian young player of the year chawimawina chu Bayern Munich rawlthar duhawm Renato Sanches hnenah pek a ni a, Euro-a an ram team champion puitu coach Fernando Santos chu coach of the year award hlan a ni.