Khatla leh Chanmari danglamna Garry

Mizoram Super League Season 3 match hmasa berah Khatla TBL-in kai thar Chanmari Hollow chu 69-67 in an hneh hram a, champion lai chakpuitu chu India player Garry Gill a ni.

Thawhlehni zan khan Hawla Indoor Stadium khatin basketball ngainatu an pungkhawm nghal a, MSL-ah India ram huapa player ṭha an inlar zel dawn avangin entu an pung zel ang.

Danglamna Garry

India team-a tel pha Garry Gill chu Khatla TBL jersey hain a inlar a, quarter tinah point nga score tling vekin inkhel pumpuiah point 29 a thawk chhuak a, rebound vawi 14 nei bawkin double-double a nei nghal.

Third quarter-ah Khatla TBL 38-39 in a la hmu tlem zawk a, Jacob Laldinliana pass chu Garry-a'n a dunk nghal. Basketball ṭawngkama alley-oop an tih hi hmuh zen zen tur a awm loh avangin inkhel entu lamin an lawm a, Khatla TBL a ti phur hle bawk.

Ngaihdan inang lo

Hollow coach Samuel Lalthla­muana chuan, "Khatla TBL chak chhan chu state pawn player an neih ṭhat vang a ni a, Mizo hlang chu ni se kan chak ang," tiin Garry chu TBL chak chhan a nih thu a sawi.

Khatla TBL coach H. Laldin­sanga chuan, "Garry chu a che ṭha ngei a, amaherawhchu vawi khat pawh practice lo a nih avangin amah vanga kan buai phahna pawh a tam hle. Kan chak chhan chu team thawhrah a ni a, Garry pawh awm lo se kan chak tho ang," tiin a khingpui coach ngaihdan a ṭawmpui lo.

Engtin zel?

Hollow lamin state pawn player Mohit Bhadu an la lut a, an sulhnu thlirin TBL player Garry a tluk lo sa a, court chhungah an inthlauhna a sang lehzual. Chanmari veng basketball club hian semifinal thlen an tum a nih chuan Mohit-a'n rang taka hma a sawn a ṭul a, hei hi thil theih a nih dawn loh chuan state pawn player

ṭha zawk an chah luh a ṭul dawn a ni.

Chutihrualin MSL-a Hollow tlin puitu Vanlalṭhazuala'n a thiam­zia a pholang a, Bungkawn tlangval hian point 21 zet a nei hial. Amaherawhchu Ṭhazuala pawhin inzirna tur a nei a, second 30 chauh awm tawh tihin a la puitling tawk loh vangin 'turn over' a siam a, champion lai lakah hnehna an chan loh phah bawk.

Chak a hlu

Khatla TBL coach Mapuia chuan, "Kan khelhdan chu eng pawh ni se kan duh ber hnehna kan chang a, hei hi kan duh ber chu a ni. Training kan nei chho a, game ṭha zawk kan la lantir ang," tiin an ṭhat dan bera an la khelh loh thu a sawi.

Hollow coach El-a chuan, "Kan shooting ṭha hi kan chhuang a, match hmasa berah erawh kan lantir thei lo. Chak loh chuan a lawm theih loh a, chutihrualin kan khelh dan hrim hrimah erawh a ṭha thaw khat viau e," tiin champion lai nen an intluk tawk thu a sawi.

Hmabak

Chanmari Hollow-in March 30 zanah MSL2 semifinalist Mission Veng Vikings an hma­chhawn ang a, March 31 zanah MSL1 final rematch a awm ang. Khatla TBL leh Zarkawt BCA inkhel tur hi a hmuhnawm ang.

Khatla QTR Chanmari
15 1ST 16
19 2ND 19
34 HT 35
17 3RD 10
18 4TH 22
69 TOT 67
Mimal Che Ṭha
Khatla TBL Chanmari Hollow
SCORE
Garry 29 Ṭhazuala 21
Lana 13 Hmachhuana 11
Mapuia 10 R-a 9
REBOUND
Garry 14 Mohit Bhadu 12
Gospel-a 4 Ṭhazuala 5
ASSISTS
Mapuia 2 Hmachhuana 5
BLOCK
Mala 3 NIL
STEAL
Lana 3 R-a 3
Ṭhazuala 3