Bellerin-a'n Barca a nghilh lo

Arsenal defender ṭhangduang Hector Bellerin chuan a chhawr chhuahna Barcelona chu engtikahmah a theihnghilh tawh loh tur thu a sawi a, Catalan club-in amah an ngaihven leh nia thuthang chu atan lawmna tur zawk a nih thu a sawi chhuak.

Kum 22-a upa Bellerin hi Arsene Wenger-a'n Barca aṭanga a lakchhuah a ni a, tun dinhmunah Arsenal manager dinhmun a chian tak loh avangin Spain international pawh hi a hma hun tur an inrinsiak mek. Bellerin hian nikum November thla khan Emirates Stadium-ah kum ruk dang cham belh turin contract thar a ziak.

Bellerin chuan, "Club lian ṭhenkhatin min ngaihven ve tih ka hriat hian ka lawm, a chhan pakhat chu hma ka sawn tihna a ni. Min ngaihventu zingah Barcelona hming a ri tel hi ka tan chuan a hlu zual bik. Barca hi chu ka seilenna hmun a nih avangin engtiakah mah ka theihnghilh tawh ngai lo ang," tiin a sawi.

La Liga club a chhuahsan chhan sawi zuiin Bellerin chuan, "Barcelona ka chhuahsan chhan kha chu ka chungah rinna an nghah ngam loh vang a ni. Khatih hunlai khan club-ah hlutna ka nei lo a, ka inkhelh theihna tur hmun ka pan," tiin Premier League club a zawm chhan a sawi bawk.

Spanish champion Barcelona hian an tlarhnung thuam chak turin player an melh tih chu a chiang a, Bellerin bakah hian Tottenham wing back Kyle Walker, Southampton defender Cedric Soares leh Valencia duhlai Joao Cancelo hming pawh lamrik a ni.