The Number 9 : Mumang ata a tak ramah

Manchester khawpuia piang leh seilian ka ni a, chumi awmzia chu kan chhungkuaah chuan inelna sang tak a awm reng tihna a ni. Krismas a ni emaw, hun pui bik a thlen chang apiangin ka chhungte chuan thilpek min hlan tur an theihnghilh ngai lo - football kaihhnawih thawmhnaw chhuak thar ber a ni mai!

Mahse, Manchester-a seilian ka nih miau avangin chhungkuaah ngaihdan a in ang vek lo - a ṭhenin Manchester United an ṭan a, a ṭhenin City an ṭan rum rut thung a! Hei vang tak hian ka thilpek dawn pawh a in ang hleithei ṭhin lo, a ṭhenin United jersey min lei a, a ṭhenin City thawmhnaw. Mahse, ka jersey dawn zingah theihnghilh theih loh pakhat chiah ka nei a, chu chu United emaw City jersey a ni lo.

Zan khat kan inkhel zo ka haw chu United fan ruhkawl ka putea'n jersey min lo lei a, a rawng sen a ni. A kut aṭangin ka la a, ngun takin ka en a, mah se a hma zawnga ka jersey dawn ṭhin nen a in ang lo. Hei hi chu a danglam bik a ni - a awm veilamah chuan logo, sakeibaknei pathum lem awmna a inchhu kalh a, a chungah chuan rangkachak rawngin arsi lem pakhat a awm bawk.

Chu ngei chu a ni ka England jersey hmasa ber chu. Number a nei ngei em tih hriat nan a hnung lam ka en a, '9' tih a lo inchhu kalh a, a chunga hming inziak chu 'ROONEY' tih a ni.

Kum 1990 chhoa England player langsar Alan Shearer leh Teddy Sheringham-te ngaisang tur chuan ka la nau mah mah a, ka tan chuan Rooney a ni vek mai. England team ka ngaihtuah let pawha ka hriatreng ṭhin chu Rooney leh Michael Owen-te tlarhmaa an inkawp kha a ni mai.

Rooney hming chuanna jersey ka dawn khan kum riat mi chauh ka la ni. Ni e, naupang dang ang bawkin ka jersey hnunga hming inziak hnung zui chakna chuan ka khat a, khami ni aṭang khan striker ka ni a, Rooney ang nih ka duh a, England tana khelh ka duh a ni.

Mahse, Manchester khawpuia seilen buaithlakna pakhat chu hei hi a ni. Kan inkhelh ṭhinna khelmual pan tur chuan kawngpui lun tak paltlang a ngai ṭhin a, ka unaute Dane leh Dwaine ten min lo kalsan hman tawh chuan ka nuin chhuah ve a phal ngai lo.

"Marcus, i unaute lo kir hun nghak rawh" a ti fo ṭhin. Mahse, chu chu ka buaina a ni lo. Khelmual a ni emaw ni lo emaw, eng thil mahin ka football khelh min dang ngai lo. Keimah chauha ka awm pawhin ka room-ah ka pet mai, a nih loh pawhin veranda-ah tal ka pet ṭhin.

Ka ute nena khelmuala inkhel tura kan kal ṭhin chu ka tana hun hlimawm ber a ni ṭhin a, aia u te nena inkhelh chu nuam ka ti em em mai a ni. Kan inkhelhna ṭhin khelmual chu a bula in ding vel chuan an hual khup a, ruah sur hnuaiah pawh inkhelh kan ṭhulh ngai lo. Kan suangtuahnaah chuan Rooney, Owen leh Rio te England tan Wembley Stadium-a an inkhel kha kan ni tlat.

Kha khelmuala inkhel ṭhinte khan suangtuahna inang vek kan neih avangin kan in unau em em a, kan inkhel kha ka thinlungah hian a la cham reng ṭhin. Inkhel ho ṭhin zingah mi engemaw zat chu academy-a zir tura thlan ni mah ila a tu a pawh kan la inkawmngeih em em vek a, Manchester United tana ka khelh thleng hian kan la inkawm a ni.

Mi tam takin engmah lo mai aṭanga rawn chawr chhuak niin min ngai ṭhin. Dik taka sawi chuan engkim hi a thleng chak lutuk a, ka thil tawn hi kei ngei pawh hian awih har tih chang ka nei fo! Season hmasaah khan ni khat chu training kan neih laiin ka ṭhianten Euro 2016 khel tura thlan ka nih thu min hrilh a, thla rei lote liam ta khan United tan ka match hmasa ber ka khelh ve chauh avangin ka tan awih chi a ni lo a, min fiam ni maiah ka ngai.

Mahse, room-a kan inthlak laiin ka bulah Phil Jones a rawn kal a, "Ṭhianpa France-ah i kal dawn," tiin min rawn hrilh a, club building ka lut chho a, staff ṭhenkhat chuan chu thu tho chu min lo hrilh a, ka phone ka la chhuak a, kan en chu ka ṭhiante, ka unaute leh ka nu message a lo awm a, an sawi chu 'England!!!!!' tih vek hi a ni.

Khatihlai khan engtin emaw tak hian ka awm a, mah se ka la awih chuang lo. Khatih hunlaia kan manager Louis van Gaal khan min rawn pan a, "Sawi lawk tur a awm" a ti a, United Under 21 tana khel turin min duh a nih dawn hi ka ti rilru a, mah se a ni lo.

"England team aṭangin call ka dawng a" a ti te te a, a sawi leh chu, "Nuam ti takin va khel ang che" tih hi a ni. Chu zawng chu a ni a sawi ni - France-ah ka kal dawn.

England tana ka match hmasa ber ka khelh hmaa ka ngaihtuahna chu suangtuahna hlirin a khat a, engtin nge England kawr ka hak chuan ka awm ang? engtin nge inthlakna room chu a awm ang? chu zawng zawng chu ka rilrua awm chu a ni.

Mahse, ka suangtuah angin engmah a ni lo - ni e, ka suangtuahna leh mitthla dan aiin engkim chu a ṭha vek zawk!

Ka theihnghilh theih hauh lo chu May 2016-a Australia nena friendly match kan khelh kha a ni. Inthlakna room-ah ka lut a, jersey hrang hrang lo inkhai ka hmu a, ka hawi kual a, ka jersey tur pawh a awm ve ngei e!

Jersey sen, a awm veilama sakeibaknei pathum lem awmna logo, a chung chiahah rangkachak rawng arsi lem! Ka en a, a hnungah '9', a chung chiahah 'RASHFORD' tih inziak ngei chu. Hlimnain ka khat a, "Mumang ram mai a ni ta lo. England tan i khel dawn" tiin ka inhrilh a.

Khelmualah minute thum chiah ka awm hman tih chuan England tana ka goal hmasa ber ka khung a nih chu! Engtinnge chu chu ka sawifiah theih ang? Sawifiah theih a ni lo. Ball-in net a tawn puar rual khan engtin emaw hian ka awm a, mah se khatiang hna hautak hlen tawh chuan a aia ṭha zawka tih zel chaknain min luah nghal.

Second half a ni a, ka theihnghilh ngai loh tur thil bawk ka tawng leh ta. Number 19 a lo lut a, a hming chu Rooney a ni. Khelmual khatah, Rooney nen England tan kan khel dun ta! A bulah ngei ka ding a, mumang chu a ni si lo.

Rooney nen khaikhin kan ni ṭhin tih ka hai lo a, mipuiin keimaha beiseina an neih pawh ka theihnghilh ngai lo. Mahse, kei chuan hmasawn zel hi ka duh chu a ni mai a, chumi atan chuan Wayne nen kan training dun thei te hi a hlu em em a ni.

Engkim min zirtir a, Wayne ka hmuh hmasak ber chu United tana ka game hmasa ber ka khelh khan a ni. Kha inkhelah khan a inhliam a, chuti chung chuan ka hnenah rawn kalin 'Ka lawmpui che' tiin min hrilh a, thil ho tak a ni mai thei a, ka tan erawh a hlu em em si.

Wayne hi mi simple tak a ni. A chi ai ngai lo a, a hahdam em em reng ṭhin. Thusawi ropui tak a sawi ngai lo a, mah se enge kan mamawh a hre ṭhin. Euro 2016 aṭanga petchhuah kan nihte khan player tin kha a mal malin kan mitah ṭheuh min en a, 'Hnual suh u, kan hmalam hunah chona tam tak hmachhawn tur kan la nei ania' tiin min hrilh ṭheuh a ni.

Wayne thusawi hian min hneh em em a, chona tam tak ka la hmachhawn leh dawn. Ram tan nomawi chawi ka duh a, theihtawp ka chhuah ang. Nakinah kan sulhnu hi thlirlet a nih hunah chuan kan nomawi chawi aṭanga teh kan nih dawn miau avangin.

March 26-ah Wembley-a ka match hmasa ber ka khel dawn a, kumina kan World Cup qualifier match hmasa berah Lithuania nen kan khel dawn. Ka naupan laiin Wembley-ah ka kal miah lo a, ka phak chin chu TV aṭanga ka nu nen inkhel kan en kha a ni. Wembley-a khelh hi England tana khelh hun ka suangtuah ang khan ka suangtuah ṭhin.

Ni e, ka suangtuahna puitlina England tana ka match hmasa ber te kha ava hlu em. Mumang satliah ang chu a ni hauh lo. Khelmual hring nghulh mai chu ka en vawng vawng a, mawi em em hian a inrual vek hian an tan a, ka en ning thei lo. Kan ṭhenawm khelmual aṭanga vawiin ka kalkawng hi ava thui si em!