Kvitova a dam zel

Wimbledon nomawi vawi hnih chawi tawh Petra Kvitova chu a ban hliam a dam mek zel a, hun rei lote hnuah tennis a khelh leh theih ngei a beisei thu a sawi.

Nikum December thla khan Kvitova hi ama chenna inah chemte hmanga beih a ni a, racquet a hman thiamna lam a ban vei lamah hliam a tuar. A hliam hi zai niin tun dinhmunah chuan a la inkhel thei rih lo.

Kum 27-a upa Kvitova chuan, "A hun leh ni tak la chiang lo mah se tennis hi chu hun reilote hnuah ka khelh leh ngei ka beisei. Ka infiamna ngainat ber hian hliam ka tawrh chhung pawhin beiseina min siamsak a, ka dam leh theih nan hian keimah bakah mi tam takin theihtawp min chhuahpui," tiin a sawi.

Czech star Kvitova inkhelh hnuhnung ber chu nikum November 12-a Fed Cup final-a French nula Caroline Garcia a hmachhawn kha a ni. Thla thum chuang court-ah a hmel a inlan tawh lo tihna a ni.