World Cup khelhna hmun inchuh Lionel Messi vs Alexis Sanchez
Zirtawpni zing dar 5:00 hian Argentina chuan 2018 World Cup qualifier khel turin Estadio Antonio Vespucio Liberti, Buenos Aires-ah Chile an lo mikhual ang. Lionel Messi leh Alexis Sanchez te ram inkhel tur hian khawvel ngaihven a hlawh, mipuiin an hmuh chak chhan pawh an dinhmun a ṭhat loh dun vang a ni.
South America aṭangin ram 10-in World Cup qualifier final round an khel a, an inkhelh kual vek hnuah a sang pali chu Russia pan turin an tling nghal ang; pangana tan playoff khelh a ngai dawn. Tun dinhmunah Argentina hian match 12 an khelh tawh aṭangin point 19 an hmu a, table-ah pangana an ni, an chung chiaha awm Chile hian poit 20 an hmu tawh thung.
Messi hoin
A kum zawna Copa America final-a an chak loh hnuah Messi-a'n ram tana inkhelh a chawlhsan a, manager thar Edgardo Bauza-a'n a ngen hnuah Barcelona star hi ram tana inkhel turin a kir leh. Argentina tan match 116 a khelh aṭanga goal 57 khung thei Messi hian an ram tan nomawi liantham chawi a duh a nih chuan Chile lakah a theihna tak tak a pholan a ngai tawh.
Ballon d'Or chawimawina vawi nga dawng tawh Messi hian Thawhlehni khan harsatna nei loin training a zawm a, player langsar dang Ezequiel Lavezzi, Angel di Maria leh Sergio Aguero te hmel hmuh tur a awm bawk. World champion vawi hnih ni tawh Argentina hian Gonzalo Higuain an nei bawk. World Cup qualifier-a match 12 khelha goal 14 chauh khung thei Argentina tan Juventus striker Higuain hi mamawh chhanna a ni thei ang.
Argentina hian Paraguay leh Brazil an ngam loh hnuah Colombia 3-0 in an hneh thei a, an player zingah hliam an awm loh avang leh Messi khelhṭhat tluan lai a nih avangin inrintawkna sang tak nen Chile an lo mikhual thei dawn.
Sanchez a dam
Arsenal-in 3-1 a West Brom an hneh loh ṭumin Gunners goal neihchhun khungtu Sanchez chu lakchhuah a ni a, Arsene Wenger-a'n a player hian a kerekah hliam a tawrh thu a sawi. Gunners manager Wenger-a'n a forwad hliam hi a serious a nih chuan ram tan a inkhelh loh tur thu a sawi, mah se Thawhlehni khan Sanchez hi Chile team training-naah a awm avangin a hliam kha na tak a ni lo tih a hriat theih.
Spanish manager Juan Antonio Pizzi kaihhruaina hnuaia khel Chile hian a zawnin Copa America nomawi an chawi thei a, World Cup qualifier-ah erawh beisei an phak rih lo. Brazil, Uruguay leh Ecuador an tluk lo a, an hnuaia awm Argentina leh Colombia te chuan vawi khat chetsual an lehpel thei bawk.
Jesus tel lohna Brazil
Manchester City hmatawng Gabriel Jesus chu hliam vanga a chawlh mek avangin Uruguay hmachhawn tur Brazil team-ah a tel lo. Uruguay hian an striker Luis Suarez chu hrem vangin an chhawr thei dawn lo bawk.
Brazil hian match 12 an khelh aṭangin goal 27 zet an khung tawh a, goal khung hnem ber an ni. Uruguay lakah hian Neymar bakah Liverpool player pawimawh Philippe Coutinho leh Roberto Firmino te chuan inkhel bul an ṭan tura ngaih a ni.
South America World Cup qualifier table-a pakhatna leh pahnihna te hi Zirtawpni zing dar 4:00-ah an intawng dawn a, world champion vawi nga ni tawh Brazil hi point lia an san fal mek avangin an chak lo a nih pawhin Tite naute hi a chung berah an awm chhunzawm tho ang.