Hamilton a phur

Tun kar tawp aṭang­in Formula 1 season thar tlan ṭan a ni dawn a, season hmasa driver cham­pionship-a pahnihna Lewis Hamilton chuan inelna hautak hma­chhawn tura a in­peih tawh thu a sawi.

Season hmasa khan Mercedes driver Nico Ros­berg chu a vawi khat nan Formula 1 champion a ni a, world title a lak aṭanga ni nga hnu lekah car intlansiak a chawlhsan. German driver Rosberg-a teammate hlui Hamilton hi tun season-ah chuan champion tura rinkai zinga mi a ni phak.

Kum 32-a upa Hamil­ton chuan, "Season thara kan car hman tur hi kum dang nena khaikhin chuan kawng kawiah a chak zawk ngei dawn a, chutihrualin a khawng avangin khalh a hautak deuh mai thei. Inelna kan hmachhawn dawn a nih hi chuan kei chu ka phur reng a, ka inpeih tawh," a ti. British driver hian kum 2008, 2014 leh 2015 te khan Formula 1 title a la tawh.

Tun hnai season thum chhung chu Mercedes-in khawvela car intlian­siakna lian ber hi an thu­­nun hneh hle, world cham­pion vawi li ni tawh Sebastian Vettel chuan season tharah chuan team dang tan kawng a inhawn ve tawh a beisei thu a sawi.

Ferrari driver Vettel chuan, "Engmah hi sawi lawk theih a ni lo, hmun hrang hranga test kan neih aṭanga a lan danin team tin hian hmasawnna kan nei vek. A bik takin kan team hian hma kan sawn nasa a, a ṭha ber nih theih kan inbeisei," a ti.

Pathianni hian tun season-a a hmasa ber atan Australian Grand Prix chu Melbourne Grand Prix Circuit, Melbourne-ah an tlan dawn a ni. Formula 1-ah hian team 10 inlan ten driver pahnih ṭheuh an nei ang.