NECS Cup 2017 Chhinga Veng leh Sihphir inhnehtawk
Mizoram Premier League club nei Chhinga Veng chuan awlsam takin NECS Cup 2017 semifinal an lut mai dawna a lan laiin Sihphir Venghlun lakah an goal an hum zo lo a, 1-1 in an inhnehtawk - semifinal lut chiang turin an match thumna an nghah a ngai.
Nimin Lammuala inkhelah Chhinga Veng hian Vanlallawma hmangin first half-ah si khat faiin hma an hruai a, an match hmasa zawka Bawngkawn an sawp tawh bawk avangin tlang chiang nghal tura ngaih an ni. Mahse, hun tawp nan minute sarih chauh a awm tawh tihah Sihphir Venghlun hian Samuel Lalchhandama hmangin an siphurh an sut.
Chhinga Veng hian an match hnuhnung berah tlachiang tawh Electric Veng an hmachhawn dawn a, an chesual fe a nih loh chuan tlang tura ngaih an ni tawh. Sihphir leh Bawngkawn te inkhela a chak zawk tan semifinal lut turin kawng a la inhawng ve bawk.
Nimin inkhel pakhat zawkah Chhinga Veng laka 7-0 a mualpho Bawngkawn chuan hun tawp dawna Immanuel Malsawmthara goal hmangin Electric Veng 1-0 in an hneh a, Sihphir Venghlun leh Bawngkawn hneh lotu Electric Veng tan semifinal luhna kawng a inhawng tawh lo.
Group A chinfel ni
Kumin NECS Cup quarterfinal hi league round a khelh a nih avangin match hmasa lama hnehna chang zo lo tan pawh beisei a awm. Group A aṭang hian team pahnih an tlang dawn a, team pathum in beisei an la nei. Vawiin chawhma dar 11:00 hian Aizawl khawpui pawn team ṭha Thingsulthliah chuan tla chiang tawh Ramhlun North an hmachhawn ang.
Ramhlun South laka goal hmahruai khungtu leh Armed Veng South an hmachhawn
ṭuma man of the match Lalfelpuia chu Tungsulthliah tana player pawimawh a ni leh ang. Ani bakah hian goal nga khung tawh Joel Lalmuanpuia an neih bawk avangin Mizoram Premier League club nei veng lakah chak tura rinkai zawk an ni.
Match hnih an khelh aṭanga point li hmu thei Armed Veng South leh Ramhlun South te chawhnu dar 1:00-ah an inkhel bawk ang. Team pahnih te hi an inhnehtawk a, inkhel dangah Thingsulthliah an chak lo a nih chuan an tlang ve ve ang. Mahse, inkhel hmasa zawkah Thingsulthliahin hnehna an chang a nih chuan tla thei ve ve an ni thung dawn a, inkhel boruak a sang ang.
Group A Dinhmun
# Team Pld W D L GF GA GD Pts
1 Chhinga Veng 2 1 1 0 8 1 7 4
2 Sihphir Venghlun 2 1 1 0 3 2 1 4
3 Bawngkawn 2 1 0 1 1 7 -6 3
4 Electric Veng 2 0 0 2 1 3 -2 0
Nimin Inkhel Results
Bawngkawn 1 - 0 Electric Veng
BAW : Immanuel Malsawmthara 83'
MoM: Immanuel Malsawmthara, Bawngkawn
Sihphir Venghlun 1 - 1 Chhinga Veng
SIH : Samuel Lalchhandama 83'
CHI : Vanlallawma 21'
MoM : Rochharzela, Chhinga Veng
Vawiin Inkhel Tur
11:00 AM Thingsulthliah Vs Ramhlun North
01:00 PM Armed Veng South Vs Ramhlun South