Mizoram beiseina titawptu West Bengal
Mizoramin kum 2014 hnua Santosh Trophy nomawi chawi an tumna chu West Bengal lakah a thamral. Nimin tlaia GMC Athletic Stadium, Bambolim-a semifinal khelhah hun pangngaiah goal a lut lo a, penalty shootout-ah sulhnu nei ṭha zawk West Bengal 6-5 in an chak.
Nizan khan inelna thlengtu Goa leh Maharashtra an inkhel a, result kan hre hman lo. Final hi Pathianni zanah khelh a ni ang a, DD Sports-ah a en theih ang.
A goal lo
Mizoram coach Lalsangzuala Hmar-in semifinal an luh theih nana Railways 5-1 a sawptute chungah rinna a nghat a, starting eleven-ah tih danglam a nei lo.
Minute 90 chhungin West Bengal chungnung hret mah se Mizoramin goal khung theihna chance ṭha an ngah zawk. First half-ah Chanmari FC forward Lalrammawia freekick pet chu Lalbiakhlua'n goal thei turah a tauh fuh lo. Lalsangbera cross chu Mizoram Police tana a khelhpui F. Lalrinpuia'n a tlawh fuh lo bawk.
Goa-ah khua a lum avangin inkhel a nung tawk lo a, second half-ah goal hlauhawm a awm meuh lo. Minute sarih chiah a awm tawh tihin midfielder Lalrinchhana volley ṭha zet chu keeper Sankar Roy-a'n a dang ṭha hle.
Bengali keeper Sankar Roy a khel ṭha a, hun hma hretin Mizoramin penalty beisei mah se referee Visvasrao-a'n a pe lo. Extra time khelh a ni a, substitute Jesse Laldinpuia ball pet chu keeper Sankar bawkin a dan sak.
West Bengal tan forward Manvir Singh leh Moirangthem Basanta an khel ṭha a, amaherawhchu Mizoram tlarhnung an paltlang thei bik lo.
Penalty bawk
Mizoramin kum 2015-ah penalty shootout hmangin Punjab an hneh lo a, West Bengal lakah an vannei chuang lo.
Mizoram tan keeper F. Lalmuanawma'n a pet goal lo a, West Bengal tan penalty pet tura hun tawp dawna lut midfielder Monotosh Chakladar-a'n a khung bik lo.
Amaherawhchu, Mizoram vanneihna a inher chhuak chuang lo a, a vawi sarihnaa Biaktea pet chu keeper Roy-a'n dan sakin Moirangthem Basanta Singh-a'n West Bengal chakna goal a khung.