Liverpool legend Ronnie a thi

Premier League club Liverpool legend leh captain hlui Ronnie Moran chu kum 83-a upa niin a thi. Moran hian Liverpool tan 1952-1966 inkarah khan a khel a, inkhelh a chawlhsan hnuah pawh kum 1998 thleng Liverpool-ah hian coaching staff zingah telin hna a thawh chhunzawm a ni.

Ronnie fapa Paul Moran chuan a pa thih thu hi twitter kaltlanga puang chhuakin, "Ka pa chu dam lohna avanga rei lote a bawksawp hnuah kan thlah liam ta a, a hrehawm takzet a ni," a ti.

Liverpool tana match 379 kheltu Ronnie hian player a nih laiin Football League First Division-ah Reds hi 1963-64 season-ah khan a champion pui. December 1959-a Reds-in an manager ropui ni reng tawh tur Bill Shankly an lakluh khan captain-ah ruat a ni a, Shankly vek hian 1966-67 season ṭan dawn khan a backroom staff zinga tel turin a sawm a ni.

Player a nih laia left back-a khel ṭhin Ronnie hian Liverpool tan player leh coach a nih hnuah nomawi 44 zet a chawi a, heng zingah hian coaching staff zinga a tel hnua league nomawi 11 leh Euro­pean Cup pali a chawi chu a tel.

Ronnie Moran hian kum 1991-a Kenny Dalglish a ban hnuah manager lailawk dinhmun a lo chelh tawh a, kum 1992 khan manager Graeme Souness zai a nih avangin manager lailawk a ni tawh bawk. Moran hian Souness zai a nih lai hian 1992 FA Cup final-ah Liverpool a kaihruai a, Sunderland lakah hnehna changin an champion a ni.

Liverpool captain Jordan Hender­son chuan, "Ronnie Moran ang player ropuiin Reds captain nihna an lo chelh tawh avangin he club captain nih hi a hlu lehzual a, min kalsan a ṭul ta mai hi Liverpool chuan kan tuar takzet a ni," a ti a, Reds legend Jamie Carragher chuan, "Kum 18 leka upa ka nih laia centre back ni tura min chhertu. Bugsy ka lawm e aw," tiin Moran hi a thlah ve bawk.