Spain mikhual tur Israel

Zanin dar 1:15 hian Spain chuan World Cup 2018 qualifier khel turin Israel an lo mikhual dawn. Qualifier bika mikhual laka tlawm khat Spain tan chak a pawimawh.

Kum 1934 aṭang khan Spain hian World Cup qualifier bikah chuan an mikhual lakah chak loh an la nei ngai lo. Tunah hian Group G-ah match li khelh tawh aṭanga point 10 hmuin hmahruaitu an ni mek a, Italy aia an chungnunna erawh goal difference chauh a ni thung. Israel hian point kua an hmu tawh thung, an mikhualna ramah hnehna an chang a nih chuan Spain hi an lehpel dawn.

Spain hi 2014 World Cup-ah khan champion lai ni chungin an inlan a, group stage an paltlang lo! Euro 2016-ah pawh beisei an phak lo, Italy hneh loin last 16 aṭanga petchhuah an ni. Tunah Italy nen group khatah an awm ho leh a, football thiam ram pahnih zinga a chungnung zawk nih an duh chuan chetsual a thiang lo ang.

Spain tan hian Chelsea player pathum Diego Costa, Cesar Azpilicueta leh Pedro te koh an ni a, anni bakah hian Premier League aṭangin David De Gea, David Silva, Ander Herrera leh Nacho Monreal te hming a lang bawk. Ram pahnihte hi tun hmain vawi li an inhmachhawn tawh a, Spain hian vawi thum hnehna chang tawhin ṭum khat an inhnehtawk.