NECS Cup 2017 ; Armed Veng South hnehtu Ramhlun South an tlang

Nimin khan NECS Cup 2017 quarterfinal khelh chhun­zawm leh a ni a, Group A ten an match hnuhnung ber khelin Armed Veng South 2-1 a hneh tu Ramhlun South leh Ramhlun North sawptu Thingsulthliah ten semifinal an lut.

Lammuala inkhel hmasa zawkah Thingsulthliah chuan Joel Lalmuanpuia hattrick bakah KT Vanlalhruaia goal hnih hmangin Ramhlun North 5-1 in an sawp. Thingsulthliah hian an match hmasa pahnihah an khingpui an inhnehtawk pui ve ve bawk avangin point nga an hmu a, group table-ah pahnihna niin a sang pali zingah an tel.

Inkhel hmasa zawkah Thing­sulthliah an chak avangin match hnuhnung zawk kheltute tan chak loh a thiang lo. Republic Veng pet chhuaktu Armed Veng South-in Lalhruaizela hmangin minute 37-naah hma an hruai, an ke lehlamin semifinal a rap.

Mahse, NECS Cup no­mawi vawi hnih chawi tawh Ramhlun South-in tlawm an tum lo. Chawlhlawk hmain Lalremruata hmanga an siphurh an sut hnuah second half-ah Lalrohlua Sailo chuan chakna goal a khung zui leh bawk a, match thum khelh aṭanga point sarih hmuin group hmahruaitu an ni.

A chiang lo?

Group B aṭangin semifinal khel turin hmunruak pahnih a awm a, Electric Veng tih loh team dang pathum tan quar­terfinal paltlang theih a la ni. Vawiin chawhma dar 11:00 hian Bawngkawn leh Sihphir Venghlun an inhmachhawn ang.

Bawngkawn hian Mizoram Premier League-a tawnhriat nei ṭha MS Dawnglian an nei. Quarterfinal-a an match hmasa berah goal sarih faiin chak lo mah se Electric Veng lakah an insiamṭha a, si khat faiin hnehna an chang.

Bawngkawn khingpui tur hi Lengpui, Bethlehem Vengthlang leh Mission Vengthlang pet chhuaktu Sihphir Venghlun an ni a, an sulhnu en chuan team ṭha an ni tih a chiang. Team pahnihte hi semiinal lut thei ve ve an nih rualin tla thei an la ni - inkhel a hmuhnawm ang.

Chawhnu dar 1:00-ah Chhinga Veng leh an veng ṭhen­awm Electric Veng ten quar­terfinal match hnuhnung ber an khel ang. MPL club awmna Chhinga Veng hi an khelhṭhat ni chuan dan ngaihna awm lo khawpa goal khung thei an ni a, inkhel ṭhenkhatah erawh an tlarhma an bil thung, heti chung hian tla chiang tawh Electric Veng laka chak tura rinkai an ni.

Nimin Inkhel Results
Ramhlun North 1 - 5 Thingsulthliah
RAN : Robert Lalruatdika 48'
THI : KT Vanlalhruaia 19', 58''; Joel Lalmuanpuia 23', 73', 79'.
MoM: Joel Lalmuanpuia, Thingsulthliah
Armed Veng South 1 - 2 Ramhlun South
ARS : Lalhruaizela 37'
RAS : Lalremruata 42'; Lalrohlua Sailo 63'
MoM : Hmingthantluanga, Ramhlun South
Vawiin Inkhel Tur
11:00 AM Bawngkawn Vs Sihphir Venghlun
01:00 PM Electric Veng Vs Chhinga Veng
Group A Dinhmun
# Team Pld W D L GF GA GD Pts
1 Ramhlun South 3 2 1 0 9 4 5 7
2 Thingsulthliah 3 1 2 0 8 4 4 5
3 Armed Veng South 3 1 1 1 4 3 1 4
4 Ramhlun North 3 0 0 3 2 12 -10 0