Goal ropui nen Poldi a chawl

"Pathianin ke vei lam chak tak mi pe a, zaninah khan a hman­na tur dik takah ka hmang," tiin Lukas Podolski chuan Ger­many tana a match hnu­hnung bera a goal ropui khung chungchang a sawi. Nilai­ni zan international friendly inkhelah world champion Ger­ma­ny chuan England 1-0 in an hneh.

Signal Iduna Park-ah Gareth Southgate-a'n manager nghet a nih hnua a match hmasa ber atan a naute a kaihruai a, an player ropui thlahna hun hmangtu Germany lamin an mikhual lakah ṭhat an chhuah duh lo. Southgate hian manager hna a chelh ngheh hmain an ram hi match li a enkawl a, hneh loh an tawng lo - manager nghet a nih hnuah erawh ṭha takin khel mah se an chak lo.

Inkhelh ṭan hmain ran tanaa match 130-na leh hnuhnung ber kheltu Podolski chu thlahna thilpek hlan a nih bakah thu sawitir a ni. Mikhual England tan Liverpool midfielder Adam Lallana chuan goal ban a tih per bakah Tottenham rawlthar Dele Alli goal khung tur chu Germany keeper Marc-Andre ter Stegen-a'n a dan sak.

Minute 69-na a ni a, Chelsea midfielder hlui Andre Schurrle-a ball pek dawngtu Podolski chuan yard 25 a hla aṭangin England goal lamah a pet thut! Arsenal forward hlui ball pet hi a kawh a, goal bar leh a ban inzawmna bul kilah tak a kal avangin England keeper Joe Hart tan tih theih a awm lo - a goal! Ram tana a goal 49-na khungtu Podolski chuan hriatreng tur sulhnu a hnutchhiah hnuah Germany jersey a hlip zui.

Prince Poldi

Germany manager Joachim Low chuan, "Germany jersey ha phak zinga player ṭha berte zinga mi," tia a sawi Podolski hi Poland-ah kum 1985 khan a piang a, a pianna ram ni loin Germany kawr a ha thung.

Kum 2003 tawp lam a ni a, Polish media-te chuan an ram coach Pawel Janas chu Podolski ngaihven turin thurawn an pe. Janas chuan, "Tun dinhmunah chuan Poland hian striker kan nei ṭha tawk a, Bundesliga match hnih emaw match thum emaw lek khel kan mamawh lo," a ti.

Kum khat a liam leh meuh chuan Germany manager Rudi Voller-a'n kum 19-a upa Podolski chu Hungary hmachhawn tur Germany team-ah koin substitute bench aṭanga tlan luhtir ve a ni. Kum 2006 a herchhuah meuh chuan Poldi hi World Cup khel tura koh a ni tawh a, FIFA World Cup Best Young Player atan thlan a ni hial.

Mangṭha le 

Bundesliga club Cologne aṭanga bul ṭantu Podolski chuan, "Si khat faiin kan chak a, inkhel hriatreng turah goal ka khung - lemchan ang mai a ni. Cologne aṭangin mipui 30,000 chuang zet an rawn kal tih ka hria, anni hmaah ka match hnuhnung ber ka khel thei a, hei baka 'mangṭha' tihna tura hun ṭha a awm thei chuang lo a, ka hmul thi te hi a ding ur ur alawm le," tiin a sawi.

Germany coach Joachim Low chuan, "England laka goal awm chhun khungtu nih kha a ropui. Ka ruahman dan chuan rei vak lo a inkhelh hnuah lakchhuah tur a ni. Mahse, chawlhlawk lai khan hun tawp hma minute tlemte la awmah thlak a duh thu a sawi, a duh angin khelmual chhungah a awm a, duhthusama ṭhain hna a thawk bawk," tiin minute 84-naa a lakchhuah Poldi chungchang a sawi.

Bayern Munich midfielder Thomas Muller chuan, "Khatiang baka thil thlen dan duhawm kha a awm thei chuang lo. Inkhelh hma khan Toni Kroos hnenah Poldi-a'n goal a khung theih nan kan pui tur a ni tiin ka hrilh. Match 130 a khelh kha ho lam takin a liam lo a, tounament kan khelh leh hunah kan la ngai zual ang," tiin World Cup 2014 champion zinga a player pui a thlah ve bawk.