MSL2-a semifinal lut pha pahnih Mission Veng Vs Zarkawt

Zanin dar 7:00 hian Mission Veng Vikings leh Zarkawt Serpents te Hawla Indoor Stadium-ah an intawng dawn a, Mizoram Super League team paruk season thumnaa an inlan inkimna tur chiah a ni.

Vikings coach Reuben Lalchhandama chuan, "Kan ṭhat ber ṭum a ni a, ka inrintawk ber ṭum a ni. Chutihrualin Serpents hi team ṭha an ni a, hneh tur chuan theihtawp kan chhuah a ṭul ang," tiin Vanglaini palai a hrilh.

Mission Veng hian Serpents hma­chhawn turin state pawn player chhawr tur an nei dawn lo a, player pahnih langsar tak erawh lakluh ngei an tum. India captain pawh lo ni tawh Rikin Shantilal Pethani leh Vikings an rem tawh a, feet ruk leh inches kua a sang center hi Federation Cup khelh vangin a la inlan thei lo.

Hetihlai hian Zarkawt Serpents erawhin state pawn player pahnih Sahil Sharma (center) leh Kanipi Shiv Kumar (forward) te an chhawr thei dawn a, Vikings hneh thei turin dinhmun ṭha takah an ding.

Serpents coach Victor Vanlalmawia chuan, "Sahil leh Shiva kan chhawr thei nghal tur hi kan lawm a, amaherawhchu anmahni vang hian chak chiang kan ni lo. Kan dinhmun chu an tiṭha sawt dawn a, chak tur chuan team thawhhona ṭha a pawimawh ang," tiin mimal aiin thawhhona chu chakna hnar a nih thu a sawi.

Vikings hian Zarkawt BCA aṭanga an lakluh Michael F. Lalawmpuia an chhawr thei dawn a, Ramhlun North tlangval hi a chet ran avangin a khingpuite tan a hnawksak ṭhin. Michael F-a chawm turin Shillong ARC player Vanlalṭhafamkima an neih belh a, shooting nei ṭha Lalrina Renthlei leh Lalrempuia Vaiphei bakah player thawkrim Moses Zoremmawia te an awm bawk avangin coach ChD-a'n kan ṭhat ber ṭum a tih hi a mak lo.

Serpents hian season liam taa semi­final thlen puitu Hmingthanmawia leh Lianhmingmawia te an la kawl a, amaherawhchu zanin hian Zarkawt tlangval Lalsangkima Ralte chu inhliam vangin an chhawr thei dawn lo. Coach Victor-a sawi lan angin thawhhona ṭha an mamawh ang.

Mission Vengin MSL2-ah ṭawiawm­na ṭha an nei a, veng dang entawn tur an nei chuang lo. Zarkawt Serpents erawhin entu tam lamah tluk loh an la ngah. Serpents coach Victor-a chuan, "Zarkawt mipui hi kan chakna hnar kaitu tur an ni. Kan inkhel en tur hian Zarkawt mipui, a pui a pang, a nawi thliar loin kan club ṭawiawm turin kan ngen a che u," tiin inkhel en turin Zarkawt mipui a sawm.