Jeje goal khung zanah India chak ; Ngaihtuahna thar sen ngai Constantine
Mizo tlangval Jeje Lalpekhlua'n India tan goal a khung tih hian chanchinthar a ni tawh lo - ram tan a match hnuhnung pariatah goal riat a khung tlat! Nilaini zan khan India chuan friendly match-ah Cambodia 3-2 in an hneh a, Jeje, Sunil Chhetri leh Sandesh Jhingan ten goal khat ṭheuh an khung - India tan June 2005-a Pakistan an hneh hnua khualmuala friendly match-a an chak lehna hmasa ber a ni.
National Olympic Stadium, Phnom Penh khawpuia inkhelah India tan Mizo rawlthar Daniel Lalhlimpuia'n inkhel bul a ṭan a, second half-ah Jeje tlan luhtir niin Jerry Lalrinzuala erawhin bench lamah hun a hmang tluan thung. India hian AFC Asian Cup UAE 2019 qualifier-ah Myanmar chu March 28 hian an hmachhawn leh ang.
Inkhel chu
India coach Stephen Constantine-a'n tun hnaia Mohun Bagan tana khel ṭha lo Jeje Lalpekhlua chu bench-a ṭhuttir a thlang a, Serchhip rawlthar Daniel Lalhlimpuia chu inkhel bul a ṭantir a, India tana la khel ngai lo defender Anas Edathodika chuan a match hmasa ber a khel bawk.
Inkhel ṭantirh aṭangin Cambodia lamin khelmual neitu an nih tarlangin inkhel an thunun a, goal khung hmasatu erawh India an ni. Minute 36-na lekah Cambodia goalkeeper Um Sereyroth tihsual nangchingin Sunil Chhetri-a'n goal hmahruai a khung.
India lawmchhung erawh a rei lo. Minute khat a liam hman chauh tihin Khoun Laboravy chuan mualneitu team tan an si phurh sutna goal a khung ve nghal a, goal dang lut loin chawlhlawk hman a ni.
India tan JJ12
British coach Constantine-a'n hnehna an chang zo lo a nih chuan a mualpho dawn tih a hria a, hnehna chan ngei tumin Mizo tlangval Jeje chu second half-ah a tlanluhtir. Mohun Bagan striker hian khelmualah minute hnih chauh hun a hmang hman tihin goal a khung nghal!
Mizo tlangval hian Manipur winger Jackichand Singh hnen
aṭanga a ball hmuh ṭha zet chu goal kilah mawi takin a pet lut a, India an phur sawt. Minute li a liam a, Jeje bawk a inlar leh ta. Tun ṭumah erawh Mizo tlangval hi goal khungtu ni loin siamsaktuah a ṭang a, Sandesh Jhingan hnena a ball pek ṭha zet chu Bengaluru defender hian a tauh lut.
Cambodia-in an mualah tlawm an duh bik lo. An striker chhuanvawr Chan Vathanaka chuan minute 62-na lekah box pawn aṭangin mawi zetin a pet lut a, India goalkeeper Gurpreet Singh Sandhu tan tih theih a awm lo. Japanese third division club Fujieda MYFC striker hian hun ṭha nei leh bawk mah se a freekick pet ṭha zet chu Stabæk goalkeeper hian a chhuah duh tawh lo.
Chhuan tur nei lo India
India-in hnehna chang mah se lawm avanga phul hlutna chi a ni lo. Cambodia hi FIFA ranking-ah 173-na an ni a, India aia an hniam zawkna hi 41 zet a ni. Second half-a Mizo tlangval Jeje tlanluhtir a nih hma zawngin India-in beisei an phak lo a, AFC Cup qualifier khel tur India khelh danah dem tur an awm a nih chuan coach Constantine a ni ang. British coach hi a squad thlan dan aṭanga sawisel hlawh tawh a ni.
Rwanda coach hlui hian tun hnaia hliam vanga chawl reng Arnab Mondal leh Fulganco Cardozo-te chu inkhel bul ṭantir a thlang a, tun hnaia Bengaluru beisei phak loh chhana mawhphurtu zinga chhiar theih Eugeneson Lyngdoh leh CK Vineeth ten inkhel bul ṭanin East Bengal-a Mehtab Hossain tluk loh vanga khelhna hmun chang tlem Rowllin Borges-a'n beisei a phak lo tluan chhuak zak bawk - Isaac Vanmalsawma leh Lalrindika Ralte a ngai mai thei!
Arnab Mondal leh Anas Edathodika te an khelh danah an in man tawk lo a, left back Fulganco Cardozo-a'n first half-a Vathanaka a tih tluk vanga penalty a chawi lo chu a lawm khawp ang. Constantine-a'n Sandesh Jhingan leh Jeje luhtira substitution a siam erawh a ti fuh a, Eugene-a khel ṭha dawn chauh tiha la chhuaka Mohammed Rafique a luhtir erawh insawifiah dan tur a vang ve ngawt ang!
Constantine thukhawchang
Cambodia-in coach thar Leonardo Vitorino hnuaiah inbuatsaihna kar hnih bawr vel chiah neichungin an aia ranking 41 zeta sang zawk India an mikhual a, hnehna chang zo lo mah se inkhel thununtu an ni. India coach pawhin hei hi hriain, "Cambodia ka lawmpui a, an khel ṭha takzet a ni. Cambodia coach ni ila chuan kar hnih chhung leka result avang hian ka lawm khawp ang," a ti.
Constantine chuan sawi chhunzawmin, "Kan tan chuan player in enchhinna a nih avangin a harsa a ni. Second half-ah kan khel ṭha a, mah se kan goal thumna kan khung hnu khan kan tha kan thlah avangin kan tuar teuh hle. A pawimawh ber erawh hnehna kan chang a, ka naute zingah inhliam an awm lo," tiin a lawm thu a sawi.