Germany leh England inhnehtawk; Italy an chak

Nations League inkhel ngaihven hlawhah Germany leh England chu 1-1 in an inhnehtawk a, Italy chuan match hmasa berah 1-1 a Germany an inhnehtawkpui hnuin Hungary chu 2-1 in an hneh bawk.

Germany tan Jonas Hofmann chuan goal hmahruai a khung a, Three Lions tan Harry Kane chuan penalty hmangin minute 88-naah an si phurh a sut - Kane-a'n ram tan goal 50 a khungna chiah a ni.

England hian an match hmasa berah rin loh takin Hungary chu 1-0 in an ngam lo a, Germany lakah point an hlawh chhuak leh hram bawk - match hnih aṭangin point khat an nei a, Germany-in point hnih an nei thung.

Hetihlai hian Italy chuan 2-1 in Hungary an hneh a, Nicolo Barella leh Lorenzo Pellegrini ten goal khat ve ve an khung a, Gianluca Mancini chuan Hungary tan hna thawhsakin an lamah a ti goal palh thung.

England an nem
Allianz Arena-a inkhelah Germany-in bul an ṭan ṭha zawk a, minute 14-na lekah hliam vanga Kalvin Phillips lakchhuah a ngaih bawk si avangin Three Lions hi an talbuai hman.

Mahse, first half chhungin team pahnihin goal an khung lo a, minute 50-naah mualneitu Germany an rawn lang - Joshua Kimmich siamsak chu Jonas Hofmann chuan harsatna nei loin goal-ah a chantir.

Hansi Flick naute hian goal an khung hmain mawi takin ball an inpe kual a, a tawpah Borussia Mönchengladbach midfielder Hofmann-a'n a hmawr a bawk a, England an hnufual.

German ho ball inpe kual a mawi rualin England-in tlarhnungah an tih tur an ti tawk lo a, kum 29 mi Hofmann-a'n goal a khung dawnin hmun awl a ngah mah mah tih a lang.

Beiseina
Germany-in goal an khung hi chuan an chak mai rinna a lian - team an ṭhat vang leh mahni muala khel an nihna piahlamah, England-in beisei an phak loh vang a ni a, goal an chhuah hnuah pawh Germany tho an hlauhawm chhunzawm.

England goalkeeper Jordan Pickford-a'n Thomas Muller leh Timo Werner chance neih duhawm a dansakte chu England vanneihzia pholangtu a ni a, mahni mualah Germany-in chak ngei an tum.

Mahse, England-in Germany chak tir bik an tum lo a, ngaihdan dang an nei tlat - hun tawp nan minute 18 chiah a awm tawh tihah Mason Mount aiah Jack Grealish luhtir a ni a, England goal nawr a na sawt.

Minute 80-naa luhtir Jarrod Bowen pawhin Three Lions inkhel a rawn tinung sawt a, a siamsak Raheem Sterling-a khung lohte chu uiawm tak a ni.

A tawpah Kane
Hun tawp nan minute hnih chiah a awm tawh a, kut ruakin England an haw dawn niin a lang hman. Mahse, SC Freiburg centre back Nico Schlotterbeck chuan Kane a titlu a, video assistant referee hmanga ennawn a nih hnuah England-in penalty an hlawh chhuak.

Three Lions tan penalty hlawhchhuaktu Kane a lo pen chhuak a, Tottenham Hotspur striker hian goal-a chantir turin harsatna a nei lo - ram tana a goal 50-na a khung a, England tana goal khung tam pahnihna ni turin Sir Bobby Charlton (49 goals) a tlansan.

Kane hian ram tana goal 50 khung tling turin match 71 bak a mamawh lo a, Three Lions tana goal khung hnem lamah match 120-a goal 53 khungtu Wayne Rooney chiah a phak lo tawh.

Kum 28 mi striker hi a vanneih zan ni se goal khat aia tam khung thei a ni - penalty a khung hmaa a chance neih German keeper Manuel Neuer-a'n a dansak hman chu pui tak a ni.

Italy an tho e!
European champion meuh ni chungin Italy-in World Cup an khel phak lo a, Finalissima-ah mualpho takin Argentina (3-0) an ngam lo bawk - coach Roberto Mancini-a'n Nations League-ah an hliam tuam dam hna a thawk ṭan nghal.

Mahse, Italy hian an match hmasa berah Germany an inhnehtawkpui nghal a, thawm a ri lehnghal. Mahse, coach rorum Mancini a nghing ve ngai lo - an match hnihnaah 2-1 in Hungary an hneh a, beiseina an nei thar ve leh ta.

Minute 30-na lekah Inter Milan midfielder Barella chuan Leonardo Spinazzola hnathawh ṭhat zarzoin goal hmahruai a khung - season hman zawh taka hliam vanga match thum chiah khel Spinazzola a hmuhnawm ta hle.

Minute 45-naah Italy hian an goal hnihna an chhunzawm a, Roma captain Pellegrini chuan European club lian hoin an it chhan pholangin, Napoli forward Matteo Politano siamsak chu goal-ah a chantir.

Midang tan Mancini!
Italy tan Roma centre back Mancini chuan goal khung theihna chance vawi hnih a nei a, mahse, vawi hnih ngawt a ball tauh ṭha tak chu Hungary goalkeeper Denes Dibusz chuan a dansak.

Minute 61-naah Mancini hian a khung ta nge nge - mahse, a duh loh dan takin a ni a, Hungary player ball cross luh chu an lamah a lo tlawh lut a, an mikhual team hi goal a lo 'khilai'.

Mahse, Italy an talbuai duh lo - hun tawp thlengin goal dang an chhuah tawh lo a, Nations League match hnih an khelh aṭangin point li an nei ta. 1-0 a hma an hruai laia kum 18 mi Wilfried Gnonto-a chance neih Hungary right back Loic Nego-a'n a lo tihbuai hmante chu uiawm tak a ni.

Italy hian June 11, Inrinni zanah England an lenchilh zui dawn - European champion ni a, Euro 2020 final-a England an hnehna khelmualah ngei khan an inlan dawn a, a boruak a 'hot' loh ring suh. Hetihlai hian Hungary hian June 11 zanah vek Germany an mikhual ang.