Point 100 nei tling thei Zarkawt BCA Vikings hmachhawn leh nghal dawn

Lalrina Renthlei bawk a langsar leh ta - Tuikhuahtlang star hian point 30 nei chungin Zarkawt BCA chu Mission Veng Hotshots lakah 100-84 in hnehna a chanpui a, zanin dar 8:00 hian Chanmari Vikings nen an inhmachhawn leh nghal ang.

Mizoram Super League season 7 neih laiah, champion nomawi kawl mektu Zarkawt BCA hi match khata point 100 nei tling thei hmasa ber an ni, an match hmasa zawka Khatla TBL an hneh ṭum pawhin point 96 ngawt an lo nei tawh bawk a ni.

Match hnih an khelh tawhah BCA an la chak ve ve a, Mission Veng Hotshots erawh vawi hnih an chak zawn hnuah an tlawm. Kai thar team hian June 11, Inrinni zanah Mizo hlanga khel Chawnpui an hmachhawn ve leh thung ang.

BCA an ṭha
A zawnin MSL nomawi vawi thum an chawi thei a, team ṭha bik an nihzia inhrilh nawn a ngai lo. Thawhlehni zan R. Dengṭhuama Indoor Stadium, Mualpuia inkhelah pawh quarter hmasa berah hniam zawk mah se a hnuhnung pathumah an sang zawk vek.

Player chah luh Joseph Fredrick Allen (27 points) a tlangnel tawh a, mahse a pawimawh laiah Mizo player an hmang thiam. Lalrina chauh ni loin Zonunsanga (22 points) leh Matthew Remtluanga Sailo (15) te an ṭangkai bawk.

BCA coach Lalruatfela chuan, "Khelmualah state pawn player pakhat bak an lut thei lo, a awmzia chu Mizo pali an awm ngei a ngai. Chuvangin chak tur chuan tualchhung player an chet ṭhat a ngai, chumi tur chuan inbuatsaihna pawh kan nei ṭhin," tiin Vanglaini a hrilh.

Zaninah Vikings nen an inkhel leh nghal dawn. Afela chuan, "Vikings hi an match hmasa berah an chesual a ni mai a, team ṭha an ni. Raymond Edward Miller Jr an nei tawh a, hei hi ven bik ngai tur a ni, kan inkhel tawk viauin ka ring," a ti.

TBL an hneh ṭumin Zonuna'n a ke a bilh a, mahse match hnihna a khel zui thei - zaninah pawh a inlan ang. Lalrina pawhin Hotshots lakah hliam tenau nei mah se, coach Afela chuan Vikings hmachhawn turin a naute an dam ṭhat thu a sawi.

Vikings leh Miller inpeih
Chamari Vikings hian an match hmasa berah Mission Veng Hotshots an ngam lo, an chak loh ṭum hian Mizo hlangin an khel. Zaninah erawh season hmasa lama an hman thiam Raymond Edward Miller Jr an chhawr thei tawh dawn.

American player Ray Miller hian a khelh fuh ṭum chuan match khatah point 50 chuang a nei thei, season hmasa khan Chawnpui (53 points) lakah a lo lantir tawh. BCA ngei lakah pawh point 32 a nei thei, zaninah point nei hnem leh tura beisei a ni.

Vikings coach H. Lalhruaitluanga chuan, "Thawhṭanni khan a rawn thleng tawh, zanah a rawn training chhunzawm nghal. Season hmasa ai khan a rihna a tlahniam a, a fit zawk bawk. A shooting pawh a ṭha tawh zawk," tiin an player chungchang Vanglaini a hrilh.

Ray Miller lo thleng tawh mah se Harsh Rao erawh an la chhawr thei dawn lo, ani hi India camp-ah a la awm. State pawn player hi vawi khatah mi pakhat bak a chhawr theih chuang loh a, buaina an nei lo tura ngaih a ni.

Chak tur erawh chuan Mizo an chet ṭhat a ngai dawn. Michael F. Lalawmpuia, Moses Zoremmawi leh Vanchuangpuia ten tawnhriat an nei ṭha - Hotshots lakah pawh rinrawl an ni, zanina BCA hneh an duh a nih chuan anni pathum hi an khelh ṭhat lehzual a ngai ang.