Alexander Zverev hliam an zai

French Open semifinal an khelh laia hliam tuar Alexander Zverev chu a ke rek zai a ni a, in zai chu a tana ṭha leh a dam hmana ber tur a nih thu German player hian instagram kaltlangin a sawi chhuak.

Rafael Nadal nen Zverev hi an inkhel tawk hle, set khatna chu tie break hmangin a hloh. Set hnihnaah pawh 6-6 a ni a, point hnuhnung ber Nadal-a'n a vuak chhuah lo lak a tumna lamah a tlu sual a, a inkhel chhunzawm thei lo.

Tennis court aṭangin wheelchair hmanga nawr chhuah nghal a ni a, enkawl lailawk a nih hnuah tiang nen a rawn kir leh a, a khingpui Nadal leh inkhel enkawltu umpire a rawn thlah, a hliam dinhmun enin inkhel thei chi a ni lo tih a chiang.

World number 3 hi eng tiang chena rei nge a chawlh dawn tih sawi theih a ni lo. Tun thla tawp aṭangin Wimbledon khelh a ni dawn, a unaupa Mischa chuan, "A ngaihna a awm lo ang," tiin grass court inelna lian atan a dam hman loh tur thu a sawi.

Kum 25 mi Zverev chuan a dinhmun sawiin, "Mitin hian zinkawng hrang hrang kan nei vek, tuna mi pawh hi ka zinkawng pakhat chu a ni ve mai. Kar hmasa lama ka ngaihtuah leh duhthusam nen chuan a danglam ta hle.

"World ranking chhuak tharah chuan pahnihna ka ni ve thei tawh ang, tiin French Open-ah khan hlawhtling ni ila tiin duhthu ka sam. Mahse, tunah chuan ka hliam zai a ngai zawk ta si, a rang thei ang berin tun hma aia ṭha zawkin lo kir ka tum," tiin a sawi.

Lawmthu sawi zuiin Zverev chuan, "Dam leh thuai tura duhsakna hrang hrang ka dawng hnem hle a, chhanlet vek sen pawh a ni meuh lo. Hun harsa ka tawh laia min thlawp tlattute chungah ka lawm takzet," a ti.

6ft 6in zeta sang Zverev hi player beiseiawm zinga mi a ni a, nomawi chi hrang hrang 19 zet a chawi tawh. Heng zingah hian ATP Finals title pawh a tel a, Tokyo Olympic-ah khan gold medal a vaw chhuak bawk - Grand Slam title erawh a la hlawh chhuak rih lo.