Footballer zingah Mbappe a hlu ber

Research group lar tak CIES Football Observatory chuan footballer-te hlut zawng an zirchianna thar ber an tichhuak leh ta a, Kylian Mbappe aia hlu an awm lo.

Paris St-German forward hlut zawng hi pound maktaduai 175.7 bawr vel nia chhut a ni a, a hnar tak Real Madrid tana khel Vinicius Jr leh Manchester City forward thar Erling Haaland ten an dawt.

Champions League final-a Liverpool veltu Vinicius-a hlut zawng hi pound maktaduai 158.3-ah chhut a ni a, Norwegian goal thun khawl Haaland hi pound maktaduai 130.4 hlutna nei anga chhut a ni thung.

A kalphung
CIES hi mawlmang takin player hlutna hi an chhut ngawt lo a, tehna hrang hrang an hmang - player kum zat, an khelh dan, an club khelhna hlut zawng, an hmasawn dan, contract rei zawng, international level-a an lar dan thlengin an chhut.

Mbappe-a'n PSG-ah kum thum daih contract thar a ziak a, kum 23 chauh a la ni a, media lam chaw tui ber a ni bawk - heng zawng zawng hian a hlutna a tisang lo thei lo a, pakhatna a ni hi a awm lo hran lo.

Player kum leh contract rei zawng thlenga en tel a nih avang hian player naupang lam tan chance a ṭha a, tun dinhmuna khawvela player langsar ber berte hlutna a sang lo a nih pawhin an kum leh contract vang a ni tel tih hriat a ṭha.

Premier League
European top five league-a league ropui ber ang hiala ngaih Premier League-in player an thawh hnem ber a, player hlu zual 100 zinga 41 ngawt chu English top flight league-a khel an ni.

Premier League player of the season ni lai Kevin de Bruyne chu top 100-a lang zinga player upa ber a ni a, kum 30 mi midfielder hi £48.9mtd hlutna nei anga chhut a ni - 76-naah a lang ve hram.

Season hman zawh taka Premier League khel player zinga top 10-a lang awmchhun chu Phil Foden a ni a, Manchester City midfielder ṭhangduang hi £105.9mtd hlutna nei anga chhut a ni.

Tlarhnung lam
Manchester City defender Ruben Dias chu player zinga hlu ber a ni a, ani hi £93.6mtd hlutna nei anga chhut a ni. Fullback zingah chuan Trent Alexander-Arnold aia hlu an awm lo a, Liverpool riht back hi £74.29mtd a hlu anga chhut a ni.

Goalkeeper zingah Gianluigi Donnarumma hlutna a la sang ber a, Italian keeper hi £62.9mtd hlutna nei anga chhut a ni. PSG keeper hi a kum a la naupan bakah season hmasa khan French club a zawm chauh a, hei hian nasa takin a hlutna a tisang.

Goalkeeper zingah Liverpool si ban nghaktu, 50-na Alisson Becker (£58.41mtd), City keeper, 59-na Ederson Moraes (£55.68mtd) leh Champions League-a Real champion puitu, 61-na Thibaut Courtois (£53.29mtd) te an lang bawk.

Barca player an hlu
Sum hman thiam loh vangin Barcelona talbuai viau mah se player tam tak khelh châkna an la ni reng a, player hlu zual zingah pawh top 10-ah player pathum ngawt an la thawh thei!

Manchester United nena sawizawm mek Frenkie de Jong (pasarihna) chu £96.1mtd hlutna neia chhut a ni a, a chungah hian £115.4mtd hlutna nei Pedri (palina) a la awm cheu - Ferran Torres chu 10-na a ni a, £93.5mtd-a hlu anga chhut a ni.

Top 100-a lang zinga naupang ber pawh Barcelona rawlthar duhawm Gavi a ni a, kum 17 mi lek ni chunga Spain senior team-a regular taka hmun chang thei hi £49.9mtd-a hlu angin an chhut.

A chhehvel
Premier League champion City-in Haaland tiam lohin City player pahnih top 10-ah an thawh a, Liverpool-in player pakhat chiah an thawh thung - pariatnaah Luis Diaz (£94mtd) a awm vang.

European top five league-a khel phak lo zingah Darwin Nunez chu player hlu ber a ni a, Liverpool leh Manchester United nena sawizawm forwar hi 47-naah awmin £59.9mtd-a hlu anga chhut a ni.

Asian footballer zingah Son Heung-min chu top 100-a lang awmchhun a ni a, South Korean superstar hi 88-naah awmin, a hlutna hi £45.17mtd angin an chhut.