Mizoram an tling zo lo

Khelo India hmeichhe football inelnaah nimin khan Mizoramin Gujarat 1-0 in an hneh lo a, semifinal an thleng zo lo. Mizoram hian knockout stage lut turin point khat chauh mamawh mah se group match hnuhnung pahnihah point an hlawh chhuak lo.

Panjab University Ground 1-ah Mizoramin inkhel an thunun a, amaherawhchu vawi khat chetsual a pawi. First half-ah ball pass sual aṭangin Gujarat-in an chhu let a, vannei takin goal an khung zui.

Mizoramin goal khat an chhuah hnuah na takin an nawr let a, Lalrinmawii leh Miriam Lalnunsiami te chance ṭha nei mah se an khung thei ta lo.

Group B-ah Haryana chu group hmahruaitu an ni a, Gujarat chu pahnihnaah awmin Mizoram erawh pathumnaah awmin an tling zo lo. Group dangah Jharkhand leh Tamil Nadu ten semifinal an lut a, Manipur an tla. NorthEast aṭanga tel pahnihin group stage an paltlang zo lo.

Mizoram manager R. Lalnunsangi chuan, "Inkhel kan thunun a, chak pawh kan phu. Kan vanduai a, kan ui takzet. Sawi ngaihna vak pawh a awm lo. Kum tluana training nei ṭhin te danglamna a lang a, inelna ṭan dawn chauh loa training ve ṭhin a châkawm hle a ni," tiin Vanglaini a hrilh.

Mizoram team hi SYS coach pahnih Manuni (manager) leh Lizzy Lalhmingsangi ten an enkawl a ni.