FIFA World Cup 2022 Asia aiawha playoff khel tur Australia
Thawhlehni zan khan Asia aiawha World Cup playoff khel tur zawnna neih a ni a, Australia-in United Arab Emirates chu 2-1 in an hneh. Socceroos hian World Cup khel turin playoff-ah South America aiawh Peru an hneh a ṭul dawn a ni.
Australia an chak
Al Rayyan Stadium, Qatar-a inkhelah UAE-in bul an ṭan ṭha zawk a, goal chance pawh an ngah zawk. Mual vei lama awm kum 19 mi Harib Al-Maazmi hmangin nawr na mah se Australia tan keeper Mathew Ryan a khel ṭha ve tlat.
Socceroos erawhin hun ṭha an bawhpelh ve lo. Minute 53-naah mual dinglam aṭangin Martin Boyle-a'n a cross a, Jackson Irvine-a'n goal-ah a chantir. Australia hmahruai chhung erawh a rei lo a, minute li hnu lekah UAE-in siphurh an sut.
Player hmuhanwm Al-Maazmi-a'n vei lam aṭangin ṭha zetin a cross a, Australia tlarhnungin clear thei loin Caio Canedo-a'n goal-ah a chantir. Inkhel a nun phah sawt.
Socceroos an insiamrem a, inkhelah chungnung ta zawk. Craig Goodwin-a'n hnai tak aṭangin a pet over a, substitute Jamie Maclaren pet pawh UAE keeper Khalid Eisa-a'n a dang ṭha hle.
Minute 84-naah Australia tan Ajdin Hrustic-a'n corner kick aṭanga ball kal zel chu box pawn chiah aṭangin a volley goal. UAE-in siphurh an sut thei lo a, Australia 2-1 in an chak.
Playoff kal hmang
Asia hian quota 4.5 an nei a, hmun ruak pali hi Iran, Saudi Arabia, South Korea leh Japan ten an hnawhkhat tawh.
World Cup khel tura tlingte hi qualifier third round-a ti ṭhat te an ni. Third round khel tur hian team 12 an tling a, group pahnihah ṭhen niin a sang pahnih ve ve an tling.
Tun ṭum playoff-a inkhelte hi an awmna group-a pathumna ve ve an ni. Inelna hi Qatar-in a thleng dawn a, hemi a nih avang hian Australia-in Peru an hneh a nih chuan Asia ram aṭangin team paruk an khel thei ang.
Inter Continental Playoff
FIFA hnuaia khawmualpui paruk aṭangin Asia, South America, North America leh Oceania ten playoff an khel thei. Playoff intum tur hi pawh a ni a, Asia-in team hautak ber tura ngaih South America a chang.
Hemi a nih avang hian Australia tan World Cup khelh hi a awlsam dawn lo a, Qatar-a inelna hmachhawn tur chuan team ṭha Peru an hneh a ṭul dawn. Australia leh Peru inkhela chak zawk hi group D-ah France, Denmark leh Tunisia te nen an awm ho ang.
Playoff pakhat zawkah North America leh Oceania aiawh te an inkhel dawn a, Costa Rica leh New Zealand te hi intluk tawk viau tura a ngaih a ni. He inkhela chak zawk hi group E-ah Spain, Germany leh Japan te nen awm ho thung ang.
Asia - Fourth Round –––––––––––––––––––––––––
June 7, Thawhlehni zan
United Arab Emirates 1 - 2 Australia
UAE : Caio Canedo 57'
AUS : Jackson Irvine 53'; Ajdin Hrustic 84'
World Cup Playoff ––––––––––––––––––––––––––
June 13, Thawhṭanni
Australia 11:30 PM Peru
June 14, Thawhlehni
Costa Rica 11:30 PM New Zealand
World Cup Thlirna Tawi –––––––––––––––––
• Inelna hi November 21 aṭanga ṭan tur a ni a, December 18-ah khelh zawh a ni ang.
• Inelna hi Qatar-in a thleng dawn a, khawpui pangaah khelh tur niin stadium pariatah khelh a ni ang.
• Ram 32 khel tur aṭangin ram 30 khel tur a chiang tawh a, playoff khel tur ram pahnih chiah a chiang tawh lo.
Group Inṭhen Dan –––––––––––––––––––––––––
Group A: Qatar, Ecuador, Senegal, Netherlands
Group B: England, Iran, USA, Wales
Group C: Argentina, Saudi Arabia, Mexico, Poland
Group D: France, Australia/Peru, Denmark, Tunisia
Group E: Spain, Costa Rica/New Zealand, Germany, Japan
Group F: Belgium, Canada, Morocco, Croatia
Group G: Brazil, Serbia, Switzerland, Cameroon
Group H: Portugal, Ghana, Uruguay, South Korea