Zanin dar 7-ah India vs South Africa

India chuan zanin dar 7:00 hian Arun Jaitley Stadium, Delhi-ah South Africa nen T20 series match nga an khelh tura hmasa ber an khel ang. Cricket inelna hi T20 zawha match hmasa ber a nih bakah kumin kum tawpah T20 World Cup a awm dawn avangin ngaihven a hlawh ang.

T20 series hi khawpui hrang hrangah khelh a ni dawn a, Delhi-a inelna neih zawh hian Cuttack (June 12), Visakhapatnam (June 14), Rajkot (June 17) leh Bengaluru (June 19) ah te an inkhel chhunzawm ang.

Inkhel en man hi Rs 850 aṭanga Rs 14,000 a ni a, stadium a khat ṭhap ṭhin. Ticket aṭanga sum lut hi BCCI hausakna pakhat a ni a, chutihrualin India ramah ngaihventu an tam avangin cricket neitu sang ber hian sponsor an hmu ṭha bawk.

Tun ṭumah hian Men in Blue hian squad an insiksawi a, IPL an khelh zawh chauh avangin squad-a awm ngei tura ngaih Rohit Sharma, Virat Kohli, Mohammed Shami leh Jasprit Bumrah te chu hahdamna hun an pe. KL Rahul kaihhruaina hnuaiah India team hian an khel ang.

IPL hnuhnung ber thlir let chuan India captain KL Rahul hian match 15 aṭangin 16 runs a siam a, Jos Buttler chiah a tluk lo. Wicket keeper Dinesh Karthik pawhin Royal Challengers Bangalore tana a khelh ṭhat rah sengin India squad-ah telh a ni a, chutihrualin vice captain Rishabh Pant hi wicketkeeper a ni tih hriat a ṭha.

South Africa lamah pawh IPL-a khel ṭha an awm nuk. Run siam tam pathumna Quinton de Kock, David Miller, Aiden Markram leh bowler ṭha mi Kagiso Rabada te hi hming langsar zingah an tel pha. Mikhual team Proteas hi awlsam taka hneh theih tur an ni lo.

India Vs South Africa
India: KL Rahul (Capt), Ruturaj Gaikwad, Ishan Kishan, Deepak Hooda, Shreyas Iyer, Rishabh Pant(VC) (wk), Dinesh Karthik (wk), Hardik Pandya, Venkatesh Iyer, Y Chahal, Kuldeep Yadav, Axar Patel, R Bishnoi, Bhuvneshwar, Harshal Patel, Avesh Khan, Arshdeep Singh, Umran Malik

South Africa: Temba Bavuma (captain), Quinton de Kock, Reeza Hendricks, Heinrich Klaasen, Keshav Maharaj, Aiden Markram, David Miller, Lungi Ngidi, Anrich Nortje, Wayne Parnell, Dwaine Pretorius, Kagiso Rabada, Tabraiz Shamsi, Tristan Stubbs, Rassie van der Dussen, Marco Jansen.