An rama kir duh Alonso

Marcos Alonso chuan Chelsea chhuahsan a duh thu a sawi chiang a, an ram Spain-ah kir leh ngei a duh. Mahse, a hma hun hi ama duh leh beisei anga tih fel duak ringawt theih a nih loh thu a sawi tel bawk.

Kum 31 mi Alonso hi Blues tana player ṭangkai berte zinga mi a ni, kum 2016 aṭang khan Stamford Bridge-ah awm tawhin hlawhtlinna pawh ṭhahnem tak a chang tawh, amaherawhchu an ram lamin a lung a la tileng tlat.

Barcelona nena sawizawm mek Alonso chuan, "Kan inremna ang chuan kum khat daih contract ka la nei, chu chu tuna ka dinhmun chu a ni. Tun hma lama ka sawi fo tawh ang khan Spain-ah inkhelh leh ka duh, ka thu erawh a ni vek lo thung.

"Ka laka Chelsea chet danah lawm lohna ka nei lo, ka dinhmunah pawh hian ka hlim tawk viau. Mahse, mahni ramah ngei inkhelh theih chu thil châkawm a ni," tiin a sawi, chhuah theihna remchang a neih chuan a hreh lo hle.

Spanish chanchinbu lian Marca tarlan dan chuan, Barca manager Xavi-a'n tlarhnung thuam chak nan Alonso hi a duh. La Liga mai bakah Champions League thlenga tawnhriat nei ṭha hi a mamawh tak pawh a ni ngei ang.

London club tan Alonso hi chhuahtir ngawt erawh a fuh lo mai thei. Antonio Rudiger chuan kum li cham turin Real Madrid a pan san tawh, an captain Cesar Azpilicueta pawh chhuak mai thei dinhmunah a la ding bawk.