Murray a chak nuamsa

Wimbledon inbuat-saih nan Andy Murray chuan Stuttgart Open a khel. Grass court inelnaa a match hmasaah Britain tlangval hian Christopher O’Connell chu 6-4, 6-3 a hnehin second round a inhlangkai.

Kum 35 mi Murray hian game hmasa pathum a hloh nghal, qualifier kaltlanga in vaw tling O'Connell lakah a mualpho dawn niin a lang hman, Mahse, darkar khat leh minute 35 an inkhelh meuh chuan set hloh loin hnehna a chang.

World number 1 hlui hian grass court season hman ṭhat a duh avangin clay-ah a inkhel mang lo. Kum tirah khan chuan clay court season hman a tum lo hial, amaherawhchu a taksa in a tlin nia a hriat avangin tournament ṭhenkhat chu a khel ta tho.

Murray hian 2013 leh 2016 khan Wimbledon title a la, khatih laia a coach Ivan Lendl nen kumin March thla aṭang khan an thawk dun leh tawh a, hliam vanga kum thum chhung harsatna a tawh hnuah hlawhtlinna chan leh theih an beisei mek.

Kar hmasa khan Surbiton Trophy-ah Murray hi inlanin semifinal-ah Denis Kudla a ngam lo. A match lehpekah chuan Kudla nen bawk an inkhel leh thei dawn, ani hian Alexander Bublik a hmachhawn thung dawn a ni.

Thawhlehni zan inkhel dangah Dominic Stricker chuan Maxime Cressy 6-7 (2), 7-6 (5), 7-6 (2) in a hneh. Swiss player hi kum 19 mi chauh a la ni a, chak lo tura rinkai ni mah se a dingchang. Second round-ah seeded pakhatna Stefanos Tsitsipas nen an inkhel ang.

Marton Fucsovics pawhin dinhmun hniama a din hnuah Jurij Rodionov 6-7 (5), 6-3, 6-4 in a hneh a, a tum leh tur hi seeded pathumna Hubert Hurkacz a nih avangin vanneih nawn a harsa mai thei.