Bale a inkhelh tam a ngai - Wales manager

Real Madrid tan khel lo mah se Gareth Bale-a'n an ram tan hmun pawimawh a chang zel. Mahse, World Cup an khelh dawn avangin Wales manager Rob Page chuan season thar lo awm turah a captain chuan match khel tam se a duh.

Wales hian kum 1958 hnua a vawi khat nan World Cup an khel dawn, football inelna lian ber khel phak tur hian Ukraine chu 1-0 in an hneh. Mumang rama an hmuh ṭhin ang kha a takin an tawng ve ta tihna a ni.

Kum 32 mi Bale hian Real Madrid tana a contract a hmang zo a, season tharah chuan man nei loin a duh zawng club a zawm thei dawn tihna a ni a, a hawi lam tur erawh hriat a la ni lo - Premier League club a zawm a rinawm.

Wales manager Rob Page chuan, "Gareth hian season hmasa lam khan match a khel tam lo, a harsatna tawh chu amah ngeiin a hria. Belarus nen kan inkhelh dawn khan team camp a rawn zawm a, rei vak lo hnuah harsatna a tawk.

"Amah nen hian kan la inbe chiah lo, chutihrualin khelh tam a mamawh tih chu amah ngeiin a hria. Amah chauh ni loin an chhungkuain kumin tawp lam atana thil ṭha ber tur an ngaihtuah ngei ang," tiin a sawi.

Wales hian March thla khan World Cup playoff-ah Austria an hneh a, tun hnai khan World Cup playoff an khel ve leh chiah, ram tana a inlan inkarah club tan minute 20 chiah a khel, Wales hi ram lian leh player ngah ni se chuan ram tan a khel phak tawh lo ang.

Page-a chuan sawi zawmin, "Ka hmuh dan chuan Premier League-ah ṭha takin a la khel thei ang, sawmna duhawm tak tak a dawn ngei pawh ka ring. Ṭha taka training ringawt a tawk lo a, match pangngai khelh a pawimawh," tiin a sawi.