Salah-a'n a hliam endik a duh lo

Liverpool forward Mohamed Salah chuan ram tana a inlan hmain club-in a hliam endik duh mah se a hnar a, Reds duhdan ang loin Egypt tan Africa Cup of Nations qualifier-ah a inlan.

Egypt hian Cairo khawpuiah Guinea chu 1-0 in an hneh a, captain Salah hoin hnehna an chang - Liverpool chuan Salah hi a hliam scan phawt an duh a, mahse, hliam en dik lohin Salah a inlan lui.

Salah hliam neihna tak hi sawi chian erawh a awm lo a, Egypt manager Ehab Galal chuan, "Hliam a nei a, mahse, chuti chung chuan a inlan tho a ni," tiin a striker chungchang a sawi.

Galal chuan Salah hliam hi inkhelh zawhah enfiah nghal a nih tur thu a sawi a, he thu buatsaih a nih lai hian eng ang taka hliam na nge a nih sawi theih a la ni lo.

Egypt hian June 9, Ningani zanah AFCON qualifier khel turin Ethiopia an lenchilh zui dawn a, June 14, Ningani tlaiah South Korea nen friendly match an khel zui ang.

Salah hi FA Cup final-a Chelsea nen an inkhelh ṭumin a lo inhliam tawh a, ni thum hnua Premier League match-a Southampton an lenchilhnaah pawh a inlan thei lo.

Mahse, ṭhal hliam vanga a chawlh hnuah Salah hian an league match tawp berah Wolverhampton Wanderers hmachhawnin goal a khung a, Champions League final-a Real Madrid nen an inkhelah a inlan bawk.

Kum 29 mi Salah hian Liverpool-ah kum khat bak contract a nei tawh lo a, Anfield-ah season khat a la cham tur thu sawi mah se contract thar ziah chungchangah erawh Merseyside club nen an la inrem thei lo.