Chile laka Argentina chhandamtu Messi
Argentina tan Copa America final-a an hneh loh zawn tawh Chile 1-0 a hneh turin Lionel Messi penalty chhuih luh a tawk! Nimin zing South America World Cup 2018 Qualifier inkhel dangah Brazil chuan Paulinho hattrick hmangin Uruguay 4-1 in an sawp.
Messi a vul
Chile defender Jose Fuenzalida-a'n box chhungah Angel Di Maria a nem tluk avangin minute 16-na lekah penalty a chawi. A pet turin Messi a rawn ding chhuak, Barcelona star Messi hian goal ban hrulah kawh zetin a chhuih lut pawp.
Nikum Copa America Centenario final New York a khelhah khan penalty shootout hmangin chak zawk zawn a ni a, Messi-a'n a hlah - penalty a chhuih luh loh aṭanga ni 269 hnuah Chile keeper Claudio Bravo nen bawk an inhmachhawn leh a, Ballon d'Or chawimawina vawi nga dawng tawhtu hian a hlah nawn tawh lo chiang hle.
Arsenal manager Arsene Wenger-a'n a ke rek na vanga West Brom an hmachhawn ṭuma a thlak Alexis Sanchez chu ni nga hnu lekah Chile inkhel bul ṭantu zingah a tel. Gunners forward hian second half-ah an siphurh sut theihna hun ṭha a hmu, freekick aṭangin Argentina goal bar a pet per dawp. Sanchez hi khelmualah minute 90 chhung a inlan a, hliam nei hmel a pu lo!
Argentina manager Edgardo Bauza chuan, "Messi khan a khel ṭha em em a, team huaisen leh beidawng duh lo Chile hneh tur chuan Leo bakah midang pawhin an khelh ṭhat a ngai ve bawk. Ka naute khelh danah ka lawm a, hmasawnna tur chu la nei mah ila a lungawi thlak thawhkhat hle. Football hi team game a nih avangin Messi a innghat ringawt erawh kan ni lo," tiin a sawi.
Kum 29-a upa Messi hian Argentina tan goal 58 khungin an ram tana goal khung hnem ber a ni. Beisei anga qualifier tir lama khel ṭha tawk lo Argentina hi hliam vanga Messi a chawlh laiin hnufual deuh mah se tunah chuan an tho leh tawh, a zawnin hnehna an chang leh ta.
Messi hi a hliam dam hnua ram tan a match hmasa berah Uruguay an hnehna goal awmchhun khungin Colombia lakah goal hmahruai khung bakah Chile hnehna goal a khung leh bawk, ram tana a match hnuhnung paliah goal thum a khung.
South America aṭangin ram 10-in qualifier round an khel mek a, vawi hnih ṭheuh an intum kual hnuah a sang pali chu Russia pan tuin an tling nghal dawn, pangana tan inter-confederation playoffs khelh a ngai ang. Argentina hian match 13 an khelh aṭanga point 22 hmuin table-ah pathumna an ni.
Brazil nge nge
World Cup champion vawi nga ni tawh Brazil tan an hmahruaina sawhnghet turin Uruguay lakah harsatna a awm lo. Tite naute hian table-a an mahni hnaih bertu an lenchilh a, minute kuana lekah Uruguay-in Edinson Cavani penalty chhuih luh hmangin hma an hruai.
Brazil hian khualmualah tlawm ngawt an tum lo. Tottenham lama beisei phak lo Paulinho-a'n hattrick a siam bakah captain Neymar chuan goal khat a thawh ve bawk - point 30 hmuin hma an hruai chhunzawm a, pahnihna Uruguay aiin point sarih zetin an sang fal tawh.
Kum 2014 World Cup thlengtu Brazil hi semifinal-ah Germany lakah 1-7 zetin mahni tualah ngei an mualpho. Football thiam ram hian an mualphona siamṭha turin Russia-ah hlawhtlina chan an duh a, tunah chuan team hlauhawm berte zinga mi an ni leh der tawh.
Kum 55-a upa Tite kaihhruaina hnuaiah match an khelh hnuhnung pariatah hnehna an chang fai vek. 2018 World Cup khelh ṭan hmain ni 444 bak a awm tawh lo a, Brazil hi an chesual thut a nih loh chuan Russia-ah kan hmuh hmel ta hle.
Nimin zing inkhel dangah table mawngphaha awm Venezuela chu Peru nen 1-1 in an inhnehtawk a, pangana Ecuador chu Paraguay lakah 2-1 in an tlawm thung.
Inkhel Results
Paraguay 2 - 1 Ecuador
PAR : Valdez 12'; Alonso 65'
ECU : Caucedo 70' (P)
Uruguay 1 - 4 Brazil
URU : Cavani 9' (P)
BRA : Paulinho 19', 52', 90'; Neymar 74'
Argentina 1 - 0 Chile
ARG : Messi 16' (P)
Venezuela 2 - 2 Peru
VEN : Villanueva 24'; Otero 40'
PER : Carillo 46'; Guerrero 64'
Team Dinhmun
# Team Pld W D L GF GA GD Pts
1 Brazil 13 9 3 1 32 10 22 30
2 Uruguay 13 7 2 4 25 15 10 23
3 Argentina 13 6 4 3 15 12 3 22
4 Colombia 13 6 3 4 16 15 1 21
5 Ecuador 13 6 2 5 23 18 5 20
6 Chile 13 6 2 5 21 18 3 20
7 Paraguay 13 5 3 5 13 18 -5 18
8 Peru 13 4 3 6 20 22 -2 15
9 Bolivia 13 2 1 10 10 32 -22 7
10 Venezuela 13 1 3 9 16 31 -15 6