Santosh Trophy final-ah Goa Vs West Bengal
Santosh Trophy vawi 71-naah inelna thlengtu Goa chuan Ningani zan khan semifinal-ah Kerala 2-1 in an hneh a, Pathianni zan dar 6:00-ah West Bengal nen GMC Bambolim-ah nomawi an inchuh ang. Final hi DD Sports-ah live a pekchhuah a ni ang.
Goa tan Liston
Goa-in Santosh Trophy-a an match hmasa berah Meghalaya 2-1 in an hneh a, chakna goal khungtu chu Liston Colaco a ni.
Goa chhim lam thingtlang khaw pakhata piang Liston hi kum 18 chauha upa ni mah se semifinal-ah inelna thlentu tan chakna hnar a ni a, minute 13-na leh 36-naah Kerala lamah a khung.
Kerala lamin darkar khat pelh hretah Rahul V. Raj hmangin an chhang let a, goal hnihna erawh an khung thei tawh lo. Kerala forward Jobby Justin-a'n a hun ṭha neihah a pet fuh tawk lo a, minute 13 chiah a awm tawh tihin midfielder Jijo Joseph freekick pet chu Goa keeper Bruno Colaco-a'n ṭha takin a dan sak.
Rematch
Group stage-ah Goa leh West Bengal hi an inhmachhawn tawh a, goal a lut lo. Goa hian vawi nga nomawi an chawi tawh a, an champoin hnuhnun ber chu kum 2009 daih tawh kha a ni.
West Bengal hian final lut turin Mizoram chu penalty-ah an hneh hram a, vawi 31 champion tawh state hian nomawi an chawi nawn a nih chuan an record ṭha tawh sa chu an tih ṭhat belh ang.
Goal khung tam te
Player Team Goal
Rajesh Soosanayakam Railways 4
F. Lalrinpuia Mizoram 3
Liston Colaco Goa 3
Jobby Justin Kerala 3
V. Lalchhuanawma Mizoram 2
Manvir Singh Punjab 2
Muhammed Parakkottil Kerala 2
Asharudeen Kerala 2