Mizo hlangin BCA chak

Zarkawt BCA-in Mizoram Super League Season 3-a an inlan hmasak berah Season Opening leh MBBA Cup champion Tuikual South chu 89-87 in an hneh.

Ningani zan khan Hawla Indoor Stadium-ah Phengphehlep-in India player Amjyot Singh leh Palpreet Singh Brar thawhchhuah pui mah se Mizo hlanga khel Zarkawt BCA an hneh lo. BCA coach Lalruatfela chuan, "Kan chak chhan hi Pathian vang liau liau a ni," tiin an hnehna chan hlut dan a hrechiang hle.

Zarkawt veng tlangval

Zarkawt club chakna kawnga player pawimawh chu Mathew Remtluanga Sailo a ni a, Pupu-a tiha an koh Mizo player zinga sang ber hian point 22 zet a nei a, tlarhnung a pui ṭha bawk.

BCA coach Afela chuan, "Amjyot kha a veng ṭha em em a, point a nei bawk. Pupu-a'n a theihna tak a pho chhuak a, MSL a khelh hnua a khelh ṭhat ber ṭum a ni," tiin a player a fak.

A hun takah Zonuna

Zarkawt BCA hian MSL-a Hollow hruai thlengtu Zonunsanga an la lut a, Ramthar Veng tlangval hian a match hmasa berah double-double nei nghal.

Zonuna hian point 15 a neih bakah assists vawi 11 zet a nei bawk a, hun tawpa Tuikual South an pawh thlak theih nan 3-points a score a, bul ṭan ṭha tawk lo mah se a tawp a khar ṭha hle.

Team thawhrah

Zarkawt BCA coach Afela chuan, "Zep loa sawi chuan chak ka inbeisei lo a, amaherawhchu ka player zawng zawng an khel ṭha vek. Sawi ang apiang an ti a, kan vai a thawhrah a ni," tiin team thawhrah a nih thu a sawi.

BCA-in MSL3-ah champion ngei tumin Amritpal leh Yadwinder Singh te an ziak lut a, chhawr hun an nei dawn. India player nena an inlan hunah an ṭha lehzual ang.

Dawrpui tlangval Afela chuan, "Kan hnehna hi MSL2 semifinal-a Tuikual South-in an player pawi­mawh ChP-a tel loa state pawn player awmna Mission Veng Vikings nen khan ka tehkhin a, kan team tan a pawimawh tak zet a ni. Kan chakna hian point hnih chauh kan hlawh chhuak lo a, phur tharna leh inrintawkna kan neih belh dawn a, hei hi a hlu a ni," tiin Vanglaini palai a hrilh.

Mipui chungah lawmthu sawi zuiin BCA coach chuan, "Veng hrang hranga min ṭantute chungah lawmthu kan sawi a, a bik takin Durtlang leh Armed Veng aṭanga min ṭan tura lo kalte chungah kan lawm zual. Min ṭawiawm chhunzawm zel ka beisei," tiin a sawi.

Inzirna tur

Tuikual South-in Palpreet Singh hoin bul an ṭan ṭha a, first quarter-a an inthlauh ringawt pawh point 13 a tling. Phengphehlep an vanduai a, third quarter-ah Palpreet leh Amjyot te luhtirin awlsam takin hnehna chan tum mah se NBA D-League club zawm thei Palpreet a inhliam a. An khingpui BCA-in chak duhna thinlung an neih len bawk avangin hun a tawp chuan chak lo zawkah an ṭang.

Tuikual South coach KC Lal­liantluanga chuan, "Season liam taa theihtawp kan chhuahna ang kha kan nei lo. Tun season-ah vawi hnih kan champion tawh a, state pawn player vangin kan inringtawk mah mah a ni thei a, kan chak lohna aṭang hian kan inzir tur a ni. Chak kan duh a, kan chesual dawn a nih chuan tun hi a hun tak zawk a ni," tiin insiamṭhatna hun ṭha an neih thu a sawi.

Hmabak

Tuikual South-in Zarkawt club an hmachhawn leh nghal dawn a, March 28 zanah Serpents nen an inkhel ang. Zarkawt BCA erawhin March 31 zanah Khatla TBL an hmachhawn dawn a, MSL1 final rematch hi basketball ngainatute en châk a ni ang.

TKS QTR BCA
29 1ST 16
17 2ND 25
46 HT 41
23 3RD 22
18 4TH 26
87 TOT 89
Mimal Che Ṭha
Tuikual South Zarkawt BCA
Score
Amjyot 26 Pupu-a 22
Palpreet 18 Zonuna 15
Faka 14 Mamate-a 11
ChP-a 9 Jack-a 11
Rebound
Amjyot 9 Dede-a 10
ChP-a 9 Faka 6