Formula 1 kan nghak chhuak
Pathianni chawhma dar 10:30 hian tun season Formula 1 intlansiak hmasa ber atan Australian Grand Prix chu tlan a ni dawn ta. Melbourne, Albert Park-a intlansiak hi Grand Prix dang 19 zetin a zui ang.
Kuminah hian kum dang ang bawkin team 10 an inlan dawn a, team tin hian driver pahnih ṭheuh an neih dawn avangin driver 20 an inel dawn tihna a ni. Champion lai Nico Rosberg-a'n nomawi a chawi aṭanga ni nga hnu lekah a chawlh thu a puan avangin kum 1994 hnua a vawi khat nan champion lai tel loin season bul an ṭan dawn.
Australian Grand Prix hi vawi 22 an neihna tur a ni a, heng zinga ṭum 20 zet chu season bul ṭan nana hman a ni. Australia-ah chuan favang lai a ni a, tlai lam ni tlak dawnah intlansiak hi neih tur a ni ang.
Melbourne-ah hian tun hnai season thum chhung chu Mercedes team ten hnehna an chang vek a, kuminah pawh hian word champion vawi thum ni tawh Lewis Hamilton chu chak tura rinkai a ni. Hamilton-a teammate Valtteri Bottas tan Mercedes car khalh chunga inelna tak a hmachhawn hmasak ber tur a ni dawn.
Melbourne tlankawng hi 5.303 a thui niin vawi 58 a tlan kual dawn a, an tlan tur zawng zawng thui zawng chu 307.574km tihna a ni. Kawng kawi 16 zet a awm a, a ngil thui a tam avangin car nei chak tan hamṭhatna a awm thei, chutihrualin driver thiam bik tan khingpuite tlan pel turin kawng kawi a tam tawk bawk.
Zirtawpni chhun khan practice vawi hnihna neih niin Mercedes driver Hamilton a chungnung ber a, a hnung chiahah world champion vawi li ni tawh Sebastian Vettel awmin pathumna chu Bottas a ni.
2017 Formula One Season Calendar
# Date Race Time
1 26-Mar Australian Grand Prix 10:30 AM
2 9-Apr Chinese Grand Prix 11:30 AM
3 16-Apr Bahrain Grand Prix 8:30 PM
4 30-Apr Russian Grand Prix 5:30 PM
5 14-May Spanish Grand Prix 5:30 PM
6 28-May Monaco Grand Prix 5:30 PM
7 11-Jun Canadian Grand Prix 11:30 PM
8 25-Jun Azerbaijan Grand Prix 6:30 PM
9 9-Jul Austrian Grand Prix 5:30 PM
10 16-Jul British Grand Prix 5:30 PM
11 30-Jul Hungarian Grand Prix 5:30 PM
12 27-Aug Belgian Grand Prix 5:30 PM
13 3-Sep Italian Grand Prix 5:30 PM
14 17-Sep Singapore Grand Prix 5:30 PM
15 1-Oct Malaysia Grand Prix 12:30 PM
16 8-Oct Japanese Grand Prix 10:30 AM
17 23-Oct United States Grand Prix 12:30 AM
18 30-Oct Mexican Grand Prix 12:30 AM
19 12-Nov Brazilian Grand Prix 9:30 PM
20 26-Nov Abu Dhabi Grand Prix 6:30 PM