Wembley-ah England
Friendly match-a Germany ngam lo hlim England chuan Pathianni zan dar 9:30-ah hian World Cup qualifier khel turin Lithuania an mikhual dawn a, Wembley stadium-ah an inkhel ang.
England-in khualmuala Germany an ngam loh hnu lawkah coach Gareth Southgate chuan, "Germany-te ang kan hmachhawn chuan eng emaw tak zir chhuah kan nei ngei tur a ni a, kan theihna sang bera kan khelh chhuah a pawimawh takzet a ni," a ti.
Pathianni zan dar 9:30-ah vek Germany an inlan dawn bawk a, Joachim Löw-a naute hian World Cup qualifier match-ah Azerbaijan chu an lenchilh ang.
England thar?
Manager thar Gareth Southgate-a kaihhruaina hnuaiah England-in system thar 3-4-3 an hmang a, Germany-ah inenchhin nan an hmang nghal.
Borussia Dortmund khelmual Signal Iduna Park-ah England-in defender pathum an hman hi kum 2006-a Croatia an hmachhawn hnua 3-4-3 an hman lehna hmasa ber a ni.
Southgate chuan, "Inbuatsaihna hun nei tam tawk lo mah ila ka players zingah he system bel sa an awm a, a la khel ngai lote pawhin harsatna nei loin an khel thei. Counter attack-ah kan hlauhawm a, chutihrual chuan passing lamah kan buai phah bawk si lo," a ti.
Lithuania thlirtu Lallana
Adam Lallana chuan 3-4-3 system hmanga khelh chu nuam a tih thu a sawi. Lallana chuan, "Ka ngaihdanah chuan 3-4-3 khan kan khel ṭha a, kan hmalam hunah pawh kan bei zel ang. Tuna pawimawh ber erawh Lithuania nena kan inkhel tur hi a ni a, goal khung ngei tumin kan nawr nghal dawn a ni," a ti.
England tana chanchin lawmawm chu Germany lakah players pathumin ram tana an match hmasa ber an khel a, an khel chhe lo vek.
Three Lions (England sawina) tan Michael Keane leh Jake Livermore ten inkhel bul an ṭan a, Nathan Redmond chu Lallana thlak turin second half-ah tlan luhtir a ni bawk. Keane hi kum 1974 hnua Martin Dobson hnua Burnley player England tana inlan leh hmasa ber a ni a, kum 1984-a Steve Hunt hnuah Livermore hi West Brom player England kawr ha leh hmasa ber a ni bawk.
England dinhmun
FIFA World Cup 2018 Russia-a khelh turah Europe-in hmun ruak 13 an nei a, he hmun ruak inchuh hian group kuaah ṭhen niin team paruk zel an awm.
Group tina hmahruaitu ṭheuh Russia pan turin an tling ang a, pahnihna zinga point hmu sang pariatin playoff khelin hmun ruak pali an inchuh leh ang. England hi Group F-ah awmin vawi li khelh tawhah tlawm hmel hmu loin table chung berah an awm mek.
England hian October 2009 hnuah World Cup leh Euro qualifier match 33 an khel tawh a, an la tlawm miah lo! Vawi 25 hnehna changin vawi riat an khingpui an inhnehtawkpui.
Inlan tur
England tan Wayne Rooney awm loh vanga captain Gary Cahill chu hrem vangin a inlan thei dawn lo a, coach Southgate erawh a buai phah lo. English manager chuan, "Team chhungkuaah hruaitu ṭha neih belh zel kan duh a, Pathianni zanah Cahill inlan thei lo pawh ni se midang chherna hun a ni mai," a ti.
Southgate hiaan hliam vangin Harry Kane, Wayne Rooney, Daniel Sturridge leh Jordan Henderson te squad-ah ko lo sa tawh a ni
Germany inlan hun
England hneh hlim Germany-in Azerbaijan an lenchilh dawn a, an huphurh lo tawp ang. Joachim Low-a naute hi Group C-ah awmin match li an khel tawh a, hnehna an la chang fai vek! Azerbaijan tan mikhual an chakawm dawn lo.
Germany tan first choice goalkeeper Manuel Neuer chu hliam vangin inhnukdawk mah se Barcelona goalkeeper Marc-Andre ter Stegen a la awm cheu a, Azerbaijan hmaa talbuai tur an ni lo. Team pahnih hi vawi li an lo intawng tawh a, Germany-in hnehna an chang fai vek - goal 15 zet an khung a, Azerbaijan lamin an chhanletna chu goal hnih chiah a ni.