Sihphir Venghlun hnehin Bawngkawn tho chhuak
Bawngkawn-in an tihsual an siamṭha tawh tih lantir nan nimin khan Sihphir Venghlun chu si thum faiin an hneh a, NECS Cup 2017 semifinal an lut. Inkhel hnuhnung zawkah tlachiang tawh Electric Veng chu Chhinga Veng lakah 7-0 in an zawr bawk. Chhinga Veng tan hian Rochharzela'n goal li a khung bakah MFA Cup 2016 best player Vanlallawma chuan hattrick a siam bawk.
Nimin Lammuala inkhelah Bawngkawn tan Mizoram Premier League season hmasa bera goal 10 khungtu MS Dawngliana chuan minute ngana lekah goal hmahruai a khung a, hun tawp dawnah Dawngtea nau Lalremruata chuan an goal hnihna khungin Sihphir Venghlun player H. Lalramsanga chuan an mahni lamah a tilut bawk.
Chanmari FC striker hlui Dawngtea hian last 16-a Chawnpui 3-1 a an hneh ṭumin goal hmahruai a lo khung tawh bawk, ani bakah hian Aizawl FC winger Lalmuankima (MK-a) an neih avangin team hlauhawm an ni leh tawh.
Bawngkawn hian an match hmasa berah Chhinga Veng 7-0 in an ngam lo a, an tlarhnung a pawp bakah an tlarhma an bil bawk. An mualpho hnuah Bawngkawn an insiamṭha, Immanuel Malsawmthara a goal khat hmanga Electric Veng an hneh hnuah Sihphir Venghlun an hneh zui leh ta - an match hnuhnung pahnihah goal an chhuah lo.
Inkhel hmasa result avangin quarterfinal hnuhnung ber boruak a zuai. Tla chiang tawh Electric Vengin semifinal lut tura beisei an neih tawh loh vangin player-ten phurna an nei lo. Chhinga Veng hian an match hmasa berah Bawngkawn 7-0 in an sawp tawh a, an match hnihnaah Sihphir Venghlun nen inhnehtawk ve bawk mah se an match hnuhnung berah erawh goal an surtir leh chiang hle - champion an sawi ngam a nih pawhin an demawm loh ang.
March 27-28 khian semifinal khelh zui a ni dawn a, Group A hmahruaitu Ramhlun South chuan Bawngkawn an hmachhawn dawn a, semifinal hnuhnung zawkah Chhinga Veng leh Aizawl khawpui pawn team awmchhun Thingsulthliah an inkhel thung ang. Final hi March 30, Ningania khelh tur a ni.
Nimin Inkhel Results
Sihphir Venghlun 0 - 3 Bawngkawn
BAW : MS Dawngliana 5'; Lalremruata 81'; H. Lalramsanga 89'(OG)
MoM : MS Dawngliana, Bawngkawn
Chhinga Veng 7 - 0 Electric Veng
CHI : Vanlallawma 38', 57', 66'; Rochharzela 44', 59', 78', 83'
MoM : Rochharzela, Chhinga Veng
Semifinal Fixture
March 27, Thawhṭanni
01:00 PM Ramhlun South Vs Bawngkawn
March 28, Thawhlehni
01:00 PM Chhinga Veng Vs Thingsulthliah
Group B - Team Dinhmun
# Team Pld W D L GF GA GD Pts
1 Chhinga Veng 3 2 1 0 15 1 14 7
2 Bawngkawn 3 2 0 1 4 7 -4 6
3 Sihphir Venghlun 3 1 1 1 3 5 -2 4
4 Electric Veng 3 0 0 3 1 10 -9 0