Kohli inlan thei lo mai thei

Vawiin chawhma dar 9:30 hian India chuan Australia nen test series an khelh meka match lina an khel dawn a, vawi thum khelh tawhah team pahnih an inhnehtawk avangin match hnuhnung ber inkhela chak zawkin series an la dawn. Hetiang taka match pawimawh khelh tur a awm lai hian India captain Virat Kohli inlan theih dawn leh dawn loh a la chiang lo.

Nimin khan Kohli hian press conference hmachhawnin, "Kan test match hnuhnung bera ka hliam avang khan ngai ka la awh leh rih lo a, 100%-a ka fit thei lo a nih chuan inlan luih ṭalh a ṭulna ka hre lo. Team physio Patrick Farhart nen ka hliam dinhmun kan en leh phawt ang a, chumi hnuah chuan ka khelh theih dawn leh dawn loh a chiang chauh ang," tiin a dinhmun a la chian theih rih loh thu a sawi.

Ranchi khawpuia test series khelh laia inhliam Kohli hian Ningani khan a hliam vangin team training a zawm tawh lo a, kum 28-a upa batsman hliam avang hian rawlthar duhawm Shreyas Iyer chu India squad-a awm tura koh a ni tawh.