Gianluigi Buffon = 1000 not out Spain leh Italy an inum
Goalkeeper ropui Gianluigi Buffon chuan professional match 1000 a khel tling a, Italy keeper hian a tana zan duhawm hlutna belhchhah turin an ram chu hnehna a chan pui a, goal a chhuah lo.
Zirtawpni zan 2018 FIFA World Cup Qualifier inkhelah Azzurri-in an mualah Albania chu minute 12-naa Daniele de Rossi penalty leh minute 80-naa Ciro Immobile goal hmangin 2-0 in an hneh. Group G inkhel dangah Spain tan David Silva, Vitolo, Diego Costa leh Isco ten goal khat ṭheuh an khung a, La Roja-in Israel 4-1 in an hneh. Point la hmu lo pahnih inkhelah FYR Macedonia-in Liechtenstein 3-0 in an hneh.
Keeper ropui
Gianluigi Buffon hi kum 39-a upa a ni tawh a, Italy squad-a goalkeeper dang pahnih Alex Meret (20) leh Gianluigi Donnarumma (18) te kum belhkhawm aiin a upa zawk.
Hetichung hian Buffon hi Italy-a club ṭha ber Juventus captain a ni a, ram tan pawh captain niin a tikimtu ringawt a ni lo. Italian keeper hian ram tan vawi 168 a inlan tawh a, Italy tana khel tam ber a ni.
Buffon hian Ecuador defender Ivan Hurtado nen ram tana an khelh zat a inang a, ram tana khelh tam lamah player pali Mohamed Al-Deayea (Saudi Arabia - 172), Claudio Suarez (Mexico - 177), Hossam Hassan (Egypt-178) leh Ahmed Hassan (Egypt-184) te chiah an awm.
Italian keeper ropui tak erawh khel tam satliah a ni lo a, club leh ram tan hlawhtlinna ṭhahnem tak a chawi tawh. Kum 2006 khan FIFA World Cup-ah Italy a champion pui a, Serie A-ah Juventus chu vawi sarih zet a champion pui tawh bawk. Mak ang reng tak erawh Buffon hian Italy hi European Championship-ah nomawi a la chawi pui lo a, Juventus hi Champions League-ah a la champion pui lo bawk.
Spain leh Italy
Group G-ah Spain leh Italy an awm kawp a, pakhat zawk hi FIFA World Cup khel lo thei dinhmunah an ding. Europe hian World Cup khel turin quota 13 an nei a, group pakua zinga a sang ber an tling nghal. Hmunruak pali hnawh khat turin pahnihna zinga pariatin playoff an khel leh bawk ang.
Italy keeper Buffon chuan, "Spain nena kan inhmachhawn leh hunah chuan rinkai zawk chu kan ni dawn lo chiang a, amaherawhchu hneh theih an ni. Eng team mah hi hneh theih loh tur an awm lo," tiin an elpui Spain chunga an awm theih thu a sawi.
Spain leh Italy hian point 13 an hmu ve ve tawh a, an inhmachhawn hmasak ṭumin 1-1 an an inhnehtawk a, September 2 khian Spain-ah an intawng leh dawn a, hei hian playoff pumpelh tur zawk a hril ang.