NECS Cup 2017 Ramhlun South hmaah Bawngkawn

Aizawl DFA leh TṬ Royte Group ṭangkawpin an buatsaih NECS Cup 2017 semifinal hmasa zawk chu vawiin chawhnu dar 1:00 hian Lammualah khelh a ni dawn, vawi hnih champion tawh Ramhlun South leh Bawngkawn te an inkhel ang.

NECS Cup hi vawi li buatsaih a ni tawh a, record nei ṭha ber chu Ramhlun South an ni. Veteran midfielder Samson Ramengmawia hoa khel Ramhlun South hi tournament tir lamah beisei angin an kal pur pur lem lo. Phunchawng (2-0) leh Venghlui (1-0) a hnehin quarterfinal an lut.

A sang pariat zinga an tel hnuah erawh Ramhlun South hi team hlauh­awm an ni. HC Zarzoliana enkawl team hian Ramhlun Derby-ah Mizoram Premier League club awmna Ramhlun North chu 5-1 in an sawp, he mi ṭum hian Vanlalthlamuana chuan goal hnih a khung. Semifinal lut tur hian in­khel pawimawhah champion tura rinkai ni phak Armed Veng South chu Lalremruata leh Lalrohlua Sailo te goal hmangn 2-1 in an hneh leh bawk - team dang tan hma­chhawn an chak awm loh.

Chanmari FC leh Bethlehem Veng­thlang tana a goal khung theihzia lantir tawh MS Dawngliana awmna Bawngkawn hi chuti maia dahhniam theih erawh an ni bik lo. MPL season hmasa ber top scorer hian tun inelnaah goal thum a khung tawh a, ani thlawp tur hian Aizawl FC forward Lalmuankima an nei bawk, khingpuite tana zuam sual theih tur an ni ang.

Bawngkawn hi quarterfinal-a an match hmasa berah Chhinga Veng lakah 7-0 in an mualpho. An match hnuhnung pahnihah erawh an insiamṭha chiang hle. Electric Veng goal khat faia an hneh hnuah Sihphir Venghlun 3-0 in an sawp leh tawh, final lut tur chuan an tlarhnung an rem phui ṭhat a pawimawh ang.

Semifinal Fixture
March 27, Thawhṭanni
01:00 PM Ramhlun South Vs Bawngkawn
March 28, Thawhlehni
01:00 PM Chhinga Veng Vs Thingsulthliah