Michael F-a'n Mission Veng a chak pui

Mission Veng Vikings-in Mizo­ram Super League Season 3-a an match hmasa berah Zarkawt Serpents chu 67-66 in an hneh hram. Zirtawpni zan inkhelah Zarkawt BCA aṭanga Vikings zawmtu Michael F. Lalawmpuia'n hun tawp ruala freethrow hmuh hmangin chakna basket a khung.

A hmuhnawm

Hawla Indoor Stadium-ah Zarkawt-in state pawn player Sahil Sharma leh Kanipi Shiv Kumar te an thawhchhuah pui a, Mizo hlanga khel Mission Veng Vikings lakah Serpents an chungnung hret.

Serpents tan captain Hmingthan­mawia'n bul a ṭan ṭha a, amah ang bawka Champhai tlangval Lalramropuia khel ṭha tluan mah se Michael F-a an ngam lo.

Vikings tan Moses Zoremmawia leh Lalrina Renthlei te an khel ṭha tawk lo a, Michael F-a erawh club tharah a tlangnel tawh hle. Ramhlun North tlangval hian hlauh nei loin a lay-up kawngah Sahil leh Kainipi an din pawhin a buai phah lo a, point 23 a hlawh chhuak.

Second 1

Second khat chiah a awm tawh tihin 66-66 a ni a, Michael F-a'n a tawnhriat hmang ṭangkaiin freethrow a hlawh chhuak. Hun a zawh tawh avangin Vikings guard Michael F-a hian freethrow vawi hniha pakhat zawk a luh hrim hrim chuan Serpents tan sut ngaihna a awm tawh lo.

Michael F-a'n a lut nghal a, Ram­hlun North tlangval hian a vawi hnihna lut ta lo mah se Vikings-in overtime khelh an pumpelh. Serpents-in an tawnhriat neih ṭhat tawk loh an an tuar a, state pawn player pahnih nei chungin an chak lo.

Eng nge an sawi?

Mission Veng Vikings coach Reuben Lalchhandama chuan, "Kan club chhungkuaa kan inlungrualna rah a ni a, club hruaitute hmalakna player-ten an zawm thlap thlap zel hi kan hlawkpui a ni. Kan thawhrimna leh tumruhna Pathianin mal min sawm sak a, supporter-in min pui ṭha bawk," tiin Vanglaini palai a hrilh.

Zarkawt Serpents coach Victor Vanlalmawia chuan, "State pawn player leh tualchhung player-te combination a la ṭha tawk lo a, kan insiamṭhat vat a ṭul a ni. Rebound-ah kan hneh lo a, free throw kan hlah hnem bawk. Chak thei turin hun tam zawkah chungnung mah ila Vikings khan tlawm an duh lo a, an sual chhuak ta a ni. An inpekna a fakawm a, keini erawh kan ṭan lehzual a ṭul a ni," tiin an vanduai thu a sawi rualin a khingpuite a fak.

Vikings QTR Serpents
17 1ST 19
12 2ND 16
29 HT 35
17 3RD 16
21 4TH 15
67 TOT 66
Mimal Che Ṭha
Mission Veng Zarkawt Serpents
Score
Michael F-a 23 LR Junior 20
Lalrina 12 Sahil Sharma 18
Rebound
Lalrina 11 Robert 7
Moses 8 Sahil Sharma 7
Assists
Lalrina 3 Khuma 2
Steal
Lalrina 4 Khuma 4