Formula 1 Ferrari leh Vettel an vul
Sebastian Vettel chuan Lewis Hamilton hnehin tun season Formula 1 intlansiak hmasa berah hnehna a chang. Nimin khan Australian Grand Prix tlan niin Ferrari leh Mercedes an chungnung hle - pakhatna aṭanga palina an hauh.
Albert Park, Melbourne-a intlansiakah pahnihna aṭanga bul ṭantu Vettel hian pole position aṭanga bul ṭantu Hamilton a lehpel a, lap 57 (302.271 km) an tlan hnuah world champion vawi thum ni tawh Hamilton lakah German driver Vettel hian 9.9sec in hnehna a chang.
Vettel hian Red Bull car khalh chungin he hmunah hian kum 2011 khan hnehna a lo chang tawh bawk, he mi hnuah ṭum chiah hi season khata intlansiak hmasa berah hnehna a chan lehna chiah a ni bawk, world champion vawi nga ni turin beisei a nei sang ang.
World champion vawi li ni tawh Vettel hian Formula 1 car a khalh hnuah vawi 43 hnehna a channa chiah a ni. Red Bull driver hlui Vettel hian Ferrari a zawm hnuah beisei angin hlawhtlina a chang lem lo. Season hmasa khan Mercedes car an umphak lo hle, kum 2015 September thla a tlan zawh tak Singapore GP hnuah hnehna a chan lehna hmasa ber a ni - GP 28 hnuah hnehna a chang ve leh chiah.
Formula 1 team hlun Ferrari hian kum 1987 khan Gerhard Berger hmangin a vawi khat nan Australian Grand Prix-ah hian hnehna an lo chang tawh a, he hmunah hian tun ṭuma mi nen hian ṭum riat an chak tawh. Kimi Raikkonen-a'n Ferrari car khalh chungin kum 2007 khan hnehna a lo chang ve tawh bawk a, tun ṭumah erawh Raikkonen hi pathumna a ni thung.
Kum 29-a upa Vettel chuan, "Bul ṭanna duhawm a ni a, kan duhthsam ni mah se kan beisei ngam chiah loh a ni. Lewis leh Mercedes hi an ṭha em em a, anni kan hneh thei hi a hlu takzet. Season tluana inel tur kan nih avangin hmabak kan thlir ang," tiin a sawi. Season ṭan hma deuha Ferrari faktu Hamilton chuan Vettel leh Ferrari team a lawmpui thu a sawi ve bawk.
Vettel hian point 25 hmuin driver championship hmahruaitu a ni nghal a, a hnungah hian Hamilton (18 points), Bottas (15), Raikkonen (12), Verstappen (10), Massa (8), Perez (6), Sainz (4), Kvyat (2) leh Ocon (1) te an awm.
Kumin hian kum 1994 hnua a vawi khat nan champion lai tel loin season bul an ṭan, season hmasa world champion Nico Rosberg-a'n nomawi a chawi aṭanga ni nga hnu lekah a chawlh thu a puan vang a ni. Rosberg hmunruak luahtu Valtteri Bottas chu Mercedes car khalh chunga a intlansiak hmasa berah pathumna a ni.
Australian Grand Prix Results
1 Sebastian Vettel Germany Ferrari
2 Lewis Hamilton Britain Mercedes
3 Valtteri Bottas Finland Mercedes
4 Kimi Raikkonen Finland Ferrari
5 Max Verstappen Holland Red Bull
6 Felipe Massa Brazil Williams
7 Sergio Perez Mexico Force India
8 Carlos Sainz Jr Spain Toro Rosso
9 Daniil Kvyat Russia Toro Rosso
10 Esteban Ocon France Force India