Barcelona-in Johan Cruyff chawimawi dawn

Spanish La Liga club Barcelona chuan an player leh manager thi ta Johan Cruyff hriatreng leh chawimawi nan an khelmual Nou Camp stadium-ah a lim an din tur thu an puang a, hei mai bakah hian an club B team stadium tur an sak mek chu Dutch legend hming chawi hian an phuah tur thu an sawi. Club president Josep Maria Bartomeu chuan, "Kan training ground-a stadium chu Miniestadi ni tawh loin Johan Cruyff stadium-a ni tawh dawn tih ka puang thei hi ka hlim takzet a ni," a ti.

Barcelona hian Cruyff chawimawi nana an hmalakna hi March 25 khan an puang a ni. Catalan club tan player leh manager a nih chhunga nomawi 13 zet chawitu Cruyff hi nikum March 24-ah khan cancer vangin a thi a, kum 68-a upa a ni. Hetihlai hian Cruyff-a fapa Jordi chuan a pain Barcelona tan a khelhlaia a hak jersey number 9 leh kum 1974-a a dawn Ballon d'Or nomawi chu Barcelona club museum-a dah tura an pek tur thu a sawi ve bawk.

Kum 2018 aṭanga Nou Camp chei ṭhat hna thawk tur Barca hian khawpui hotute hnenah an stadium pawhtu kawngpui zinga pakhat chu Johan Cruyff hming chawia thlak tura ngenna thlen an tum bawk a ni. Catalan club president Bartomeu chuan, "Cruyff hian tih theih loh a ti a, khawvel mithmuha min pho chhuaka engkim tih theih a nihzia min hmuhtirtu a ni," tiin kum 1992-a club-in European Cup an lak hmasak ber chawipuitu Cruyff an chawimawi chhan a sawi.

Cruyff-a sulhnu
Player
Ajax : European Cup (3), European Super Cup (2), Dutch league title (8), Dutch Cup (5), Intercontinental Cup (1), Super Cup (1)
Barcelona : Spanish league title (1), Spanish Cup (1)
Feyenoord : Dutch league title (1), Dutch Cup (1)
Manager
Ajax : European Cup Winners' Cup (1), Dutch Cup (2)
Barcelona : European Cup (1), European Cup Winners' Cup (1), European Super Cup (1), Spanish league title (4) Spanish Cup (1), Spanish Super Cup (3)