Roger Federer-a'n bul ṭan fuh

Roger Federer chuan kum bul a ṭan fuh a chhawm nung zel a, Inrinni zan khan Miami Open-a a match hmasa ber khelin Frances Tiafoe a hneh. Inkhel dang­ah Rafael Nadal leh Stan Wawrinka te pawhin hnehna an chang ve bawk.

Kum 35-a upa Federer hi 2014 hnua a vawi khat nan Mimai Open-ah a inlan a, American rawlthar Tiafoe lakah hian a service hmasa vawi 20 zet chu point hmu fai vekin 7-6(2), 6-3 in hnehna a chang.

Grand Slam vawi 18 champion tawh Federer hian kuminah match 15 khel tawhin ṭum khat chiah chak loh a la nei. Miami Open a khelh hma hian Australian Open leh Indian Wells nomawi a chawi.

Miami Open nomawi vawi hnih chawi tawh Fede­rer chuan, "Frances khan thahrui a ngah tih ka hriat avangin keima lam ka insiamrem a ṭul tih ka hre lawk. Ka service khan nasa taka min puih avangin hnehna ka chang hram," tiin a chapo lo hle.

Federer hian a match lehpekah chuan Juan Martin del Potro a hmachhawn ang. US Open champion hlui Del Potro hian Robin Haase chu 6-2, 6-4 in a lo hneh ve bawk.

Seeded pakhatna Stan Wawrinka chuan Horacio Zeballos 6-3, 6-4 in a hneh. Grand Slam vawi thum champion tawh Wawrinka hian thli thawin a tihbuai vel kara hnehna a chang thei chu lawmawm a tih thu a sawi.

Inkhel dangah Nadal chuan Dudi Sela 6-3, 6-4 in a hneh. Nadal hian Miami Open hi vawi 13 a khelhna a ni a, final ṭum li zet khel tawh mah se Spain tlangval hian he hmunah hian nomawi a la chawi lo.

Seeded 12-na Nick Kyr­gios chuan Damir Dzumhur 6-4, 6-3 in a hneh a, Tomas Berdych-a'n Russian tlangval Andrey Rublev 6-3, 6-2 a a hneh laiin seeded parukna Dominic Thiem erawh kum 20 chauha upa Borna Coric lakah 6-1, 7-5 in a chak lo thung.