British Derby-ah chak zawk awm lo

Zirtawpni zan British Derby-ah Republic of Ireland leh Wales an inhmachhawn a, World Cup qualifier inkhel boruak sangah goal khung loa inhnehtawkin Welsh defender Neil Taylor chu hnawhchhuah a ni. Wales hian Group D-ah pathumna dinhmun luahin pahnihna Ireland hi point liin an phak lo mek a, Russia 2018-a inlan turin an dinhmun a him ta lo hle.

Euro 2016-a inlan phak tawh lo Netherlands-in khualmualah Bulgaria chu 2-0 in an ngam lo a, group A-ah palina dinhmun an luah mek! Netherlands tan World Cup khelh beiseina a chau a, Euro-a an inlan loh hnu lawka World Cup an khel lo bawk a nih chuan fan-ten an pawm thiam tawh kher lo ang.

Beisei phak lo Wales

Euro 2016 khel tura Wales an tlin khan kum 58 hnua major tournament an khelh hmasak ber a ni a, semifinal an luh bawk avangin beiseina sang tak nen FIFA World Cup Russia 2018 an thlir. Mahse, Wales beisei ang ngawtin thil a kaltluang lo a, World Cup qualifier match nga an khelh tawhah vawi khat chiah hnehna la changin a bak zawngah an khingpui an inhnehtawkpui vek!

Ireland khelmualah pawh Wales-in hnehna chan ngei tum mah se an tum angin an nawr na tawk thei lo a, Georgia leh Serbia an mikhual ṭuma an goal khung theih loh hri in Wales a man chhunzawm! Euro 2016 semifinalist-in Gareth Bale leh Aaron Ramsey hmangin nawr tum viau mah se player pahnih hi hliam damkawr an nihna a lang chhuak a, Ireland-in an tlarhnungah players an rem khah tlat reng bawk avangin goal an khung thei lo.

Boruak a sang

Republic of Ireland captain Seamus Coleman chu minute 72-naah hliam vanga lakchhuah a ni a, Everton defender tlawh natu Neil Taylor chu hnawhchhuah a ni bawk. Ireland manager Martin O'Neill chuan, "Seamus hian a keah hliam na tak a tuar a, Inrinni khan zai nghal a ni. Club leh ram tana season duhawm tak hmang mek a nih avangin channa nasa tak a ni," tiin a defender chungchang a sawi.

Wales manager Chris Coleman chuan, "Tuna pawimawh ber chu Seamus Coleman a ni a, a dinhmun a ṭha lo tih kan hriatin pawi ka ti takzet. Chutihrualin Neil hi mi tihnat duh mi a ni lo," tiin a defender a chhan nghal. Ireland defender John O'Shea chu Gareth Bale-a'n a tlawh avangin a inhliam bawk a, Real Madrid forward Bale hi yellow card pek a nih avangin June 11-a Serbia nen qualifier an khelh hunah a inlan thei lo ang.

Sunderland defender O'Shea chuan, "Hliam na tak tuar loin ka chhuak hlauh a, ka vannei hle. Ṭum dang ang chu ni se Bale kha hnawhchhuah tur a ni," tiin Wales chhuanvawr chet dan a dem hle.

Netherlands an chuai

Euro 2016 inlan lo Netherlands in chak ngei an mamawh tih hre mah se coach Danny Blind-a'n Bulgaria lakah kum 17 leka upa centre back Matthijs de Ligt inkhelh bul ṭantir a thlang a, Dutch league-a minute 268 bak la inlan lo defender tihsual vang hian Bulgaria tan Spas Delev chuan goal hnih khungin an khelmualah a team hi hnehna a chanpui.

Netherlands captain Arjen Robben chuan, "Engtinnge kan hrilhfiah theih ang? Zanin hi kan tan chuan mangchhia ang mai a ni. Boruak zangkhai leh inringtawk tak chungin he hmunah hian inkhel turin kan kal a, mah se first half-a kan khelh dan en khan chak kan phu lo a ni," a ti a, rawlthar De Ligt sawisel bik duh loin, "Indem theih a ni a, mah se insawisel hian enge hlawkna a neih? Game ṭha tak khel ila, hnehna kan chang a ni mai. Mahse chutianga kan tih loh avang chuan ni duhawm lo tak kan hman phah a ni," tiin a sawi.

France an kal zel

Netherlands-in hnehna an chan zawh loh laiin France erawh an hmahruaina an chhawm­nung zel a, an mikhual­na ramah Luxembourg chu 3-1 in an hneh. France tan Olivier Giroud chuan minute 28-na lekah goal hmahruai khung mah se Luxembourg-in Blaise Matuidi penalty chawi chhawr ṭangkaiin Aurelien Joachim hmangin an si phurh an sut a, France an hawihai.

Mahse, Didier Deschamps-a nauten an hnuai chiaha awm Sweden-in Belarus 4-0 ngawtin an sawp tih an hriat avangin an tha an thlah duh lo a, an hmahruaina chhawm nun an duh. Minute 37-naah France-in an beidawn duh loh rah sengin Antoine Griezmann chuan penalty aṭangin an hmahruaina goal a khung a, Arsenal striker Giroud chuan minute 77-naah a goal hnihna a khung leh bawk - ram tan a goal 23-na niin France tana goal khung tam 10-na a ni. France tan rawlthar duhawm Kylian Mbappe chu second half-ah tlan luhtir a ni a, ram tana a match hmasa ber a ni.

Group A
Inkhel Results
Sweden 4 - 0 Belarus
Bulgaria 2 - 0 Netherlands
Luxembourg 1 - 3 France
Team Dinhmun
Team Pld W D L GF GA GD Pts
France 5 4 1 0 10 3 7 13
Sweden 5 3 1 1 10 3 7 10
Bulgaria 5 3 0 2 8 10 -2 9
Netherlands 5 2 1 2 8 6 2 7
Belarus 5 0 2 3 2 10 -8 2
Luxembourg 5 0 1 4 6 12 -6 1
Group D
Inkhel Results
Georgia 1 - 3 Serbia
Austria 2 - 0 Moldova
Republic of Ireland 0 - 0 Wales
Team Dinhmun
Team Pld W D L GF GA GD Pts
Serbia 5 3 2 0 12 6 6 11
Republic of Ireland 5 3 2 0 7 3 4 11
Wales 5 1 4 0 8 4 4 7
Austria 5 2 1 2 8 7 1 7
Georgia 5 0 2 3 4 8 -4 2
Moldova 5 0 1 4 2 13 -11 1