Goal 46 khung thei Hernandez

Mexico tan Javier Her­nandez chu goal khung hnem ber a ni ta. Manchester United striker hlui hian kartawp Wold Cup qualifier-a Costa Rica si hnih faia an hneh ṭumin goal hmahruai a khung.

Azteca-a inkhelah Hernandez hian minute sarihna lekah goalkeeper Keylor Navas chip khum­in goal a khung. Kum 28-a upa Hernandez hian ram tan match 89 a khelh aṭangin goal 46 a khung thei a, Jared Borgetti-a'n kum 2008-a ram tana goal khung hnem ber record a lo siam tawh chu a nihrual chiah.

Inkhel dangah Clint Dempsey goal hnih khung hmangin US chuan Honduras 6-0 in an sawp ve bawk. Coach Jurgen Klinsmann an ban hnuah US hian Bruce Arena an lalut a, a zawna match hnih an chak loh hnuah chak ni hmel an hmu ve leh ta.

CONCACAF aṭang hian ram paruk ten 2018 FIFA World Cup qualifier round ngana an khel mek a, a sang pathumte chu Russia pan turin an tling nghal dawn - palina tan confederation playoffs khelh a ngai ang.

Mexico hian match thum an khelhah point sarih hmuin hma an hruai mek a, pahnihna chu point ruk hmutu Costa Rica an ni. US hian point thum hmuin palina an ni a, Trinidad and Tobago leh Honduras te nen an point a inzat.